Якія сімптомы паказваюць на рак кішачніка і што правакуе яго развіццё? Тлумачыць анколаг

— Ірына Генадзеўна, чаму каларэктальны рак — рак абадочнай і прамой кішкі — апынуўся ў лідарах: з-за харчавання ці з-за паляпшэння дыягностыкі?

— У большай ступені — з-за харчавання. Іншы істотны фактар рызыкі — маларухомы лад жыцця. Адначасова палепшылася дыягностыка. Нашы людзі сталі больш дасведчанымі ў прафілактыцы анкалагічных захворванняў, часцей звяртаюцца да доктара. Скрынінг каларэктальнага раку таксама адыграў сваю ролю.

— Што не так з нашым рацыёнам?

— Найперш трэба выключыць канцэрагенныя рэчывы — гэта тыя, што спрыяюць узнікненню раку.

Яны могуць утрымлівацца ў прадуктах харчавання ў натуральным выглядзе ці ўтварацца падчас прыгатавання. Трэба ведаць, дзе яны знаходзяцца, і як скараціць іх колькасць. Менш смажанага, менш прыгатаванага на адкрытым агні. Абмяжуйце ўжыванне вэнджаніны (рыбы, мяса, курыцы, каўбас, сыру). Калі з’ясце кавалачак раз на месяц — нічога страшнага. Але нельга рабіць гэта штодзённай звычкай.

Памятайце: канцэрагены ёсць у каўбасных вырабах, вяндліне, іншых прадуктах, дзе выкарыстоўваюцца нітрыты.

Фастфуд раю цалкам выключыць. Калі складана — хоць бы максімальна абмяжуйце. Фры, пончыкі і іншае — утрымліваюць транстлушчы, якія таксама звязваюцца з анкалагічнымі рызыкамі.

Раз на месяц — гэта мяжа для фастфуду.

— Шаурма лічыцца фастфудам?

— Не.

— Ужо весялей. А што мусіць быць у рацыёне кожны дзень?

— Агародніна, садавіна (у любым выглядзе), зеляніна, рыба. Мясаедам — індычка, курыца, менш чырвонага мяса, асабліва свініны. Свініна смачная, зразумела, але трэба выбіраць паміж смачным і карысным. Найлепшыя спосабы прыгатавання — запяканне, тушэнне, варка. Самая карысная — ежа на пары.

«Галоўнае — не зацягваць!»

— Ці лечыцца рак кішэчніка?

— Так, калі выяўляюць своечасова. Пры наступных сімптомах звяртайцеся да доктара: кроў у кале, перыядычныя запоры, болі… У такім выпадку трэба рабіць каланаскапію. Не зацягвайце!

— Ці ўплываюць лекі на развіццё раку?

— Не.

Важна ведаць

Каланаскапія — эндаскапічны метад даследавання, які дазваляе агледзець слізістую абалонку тоўстай кішкі.

Доктар выкарыстоўвае каланаскоп — гнуткі зонд з камерай на канцы, якая перадае малюнак на манітор. Гэта даследаванне — надзейны спосаб паставіць дакладны дыягназ і выбраць метад лячэння.

Падчас працэдуры можна выдаліць паліпы да 5 мм праз інструментальны канал. Таксама магчыма ўзяць біяпсію з утварэнняў, каб выключыць рак. Без гэтага немагчыма вызначыць, ці злаякаснае ўтварэнне.

У Мінску каланаскапію робяць з седацыяй і без яе.

Седацыя — унутрывеннае ўвядзенне прэпаратаў, якія выклікаюць стан лёгкага сну. Седацыю не робяць пры эпілепсіі, індывідуальнай непераноснасці кампанентаў, цяжкіх сардэчна-сасудзістых хваробах і іншых супрацьпаказаннях.

• 22
• 1
• 1
• 3
• 1
• 8
• 0
• 0