Памёр былы саліст расійскіх Міхайлаўскага і Марыінскага тэатраў Валерый Паноў
Ён нарадзіўся ў Віцебску, а ягоны сын лічыўся першым панкам у СССР.
У Ізраілі на 88-м годзе жыцця памёр артыст балета і харэограф Валерый Паноў. Да эміграцыі з СССР у 1974 годзе ён танцаваў у ленінградскім Малым тэатры оперы і балета і Тэатры оперы і балета імя Кірава, цяпер вядомых як Міхайлаўскі і Марыінскі тэатры. Пасля — быў вядучым танцорам Берлінскага опернага балета і пастаноўшчыкам балетаў на вядучых сусветных сцэнах, паведамляе Расійская служба Радыё Свабода.
Нарадзіўся Паноў у Віцебску ў 1938 годзе і меў прозвішча Шульман (Паноў — прозвішча яго першай жонкі), вучыўся ў Вільні, Маскве і Ленінградзе, дзе скончыў харэаграфічнае вучылішча. У Савецкім Саюзе ён танцаваў у «Пятрушцы» Канстанціна Баярскага, «Паненцы і хулігане» Гулбата Давіташвілі, «Краіне цудаў» Леаніда Якабсона, «Гамлеце» Канстанціна Сяргеева, «Стварэнні свету» Наталлі Касаткінай і Уладзіміра Васільева.
У 1972 годзе Паноў і ягоная жонка, балерына Кіраўскага тэатра Галіна Рагозіна, падалі заяву на выязную візу ў Ізраіль. Іх выключылі з балета, яго ненадоўга арыштавалі, яны былі выпушчаныя з краіны пад міжнародным ціскам.
Яны танцавалі ў балетных групах «Бат-Шэва» і «Бат-Дор», выступалі ў Берліне, Паноў ставіў спектаклі ў Вене, Сан-Францыска, Осла, Стамбуле. Быў мастацкім кіраўніком Каралеўскага балета Фландрыі і балетным дырэктарам Дзяржаўнай оперы ў Боне.
Сын Панова, Андрэй, застаўся ў Ленінградзе і стаў рок-музыкантам, заснавальнікам адной з першых у краіне панк-груп — «Автоматіческіе удовлетворітелі».
На грошы, якія бацька дасылаў з-за мяжы, ён набыў інструменты і ўстаноўку для барабанаў. У кампаніі Панова-малодшага ўзніклі першыя вядомыя савецкія рок-групы, у тым ліку «Кіно».
Валерый Паноў памёр 3 чэрвеня ў Ашдодзе, дзе заснаваў уласную балетную школу. Пахаванне артыста адбылося ўдзень 4 чэрвеня.
-
«Ніхто не адніме у мяне права памерці рускім. Слава Расіі!» — перадсмяротнае паведамленне сына расійскага апазіцыянера Гудкова
-
Трамп запосціў жартаўлівы ролік па матывах нападу тыгра на чалавека ў брытанскім заапарку. Сваякі загінулага абураныя
-
Джорджа Мелоні: Ніхто не пераканае мяне ў тым, што капітуляцыю таго, хто абараняе сваю свабоду, можна называць «мірам»
Цяпер чытаюць
У Эстоніі арыштаваны Алег Маісееў, кажуць яго знаёмыя. Гэта былы кіроўца Ціханоўскай, які з часам стаў яе зацятым крытыкам7
Каментары