АўтаВАЗ паказаў новы красовер Lada Azimut. Што за ён і калі будзе ў продажы
У Беларусі аўтамабілі Lada — сярод самых прадаваных.
Без задняга прываду
Новы паркетнік ад Lada атрымаў назву Azimut. Мадэль пабудаваная на дапрацаванай платформе Vesta. Чакаецца, што Lada Azimut з’явіцца ў продажы ў 2026 годзе.
Навінку паказалі ў рамках Пецярбургскага міжнароднага эканамічнага форуму.
Аўтамабіль будзе даступны з маторамі 1,6 і 1,8 літра магутнасцю 120 і 132 к.с. адпаведна. На выбар ёсць механічная каробка і варыятар.
Адметна, што паркетнік будзе толькі ў версіі з прывадам на пярэднія колы, паколькі платформа Vesta, на якой пабудавана аўто, не прадугледжвае магчымасці выпускаць мадэль з поўным прывадам.
Згодна з інсайдарскай інфармацыяй, навінка будзе каштаваць каля 2,5 мільёна расійскіх рублёў, што прыблізна 32 тысячы даляраў па актуальным курсе. У Беларусі цана, меркавана, будзе ніжэйшай, бо ўсе аўтамабілі маркі Lada ў нас каштуюць танней, чым у Расіі.
Не першая спроба пачаць выпуск новага красовера
Адзначым, што гэта ўжо другая спроба АўтаВАЗа запусціць новую мадэль паркетніка цягам апошніх гадоў. Папярэдняя аказалася правальнай.
Яшчэ напрыканцы 2023 года ў продаж мусіў паступіць красовер Lada X-Cross 5, які фактычна быў кітайскім FAW Bestune T77, але расійскай зборкі і з шыльдай Lada.
«Навінку» пачалі збіраць на былым заводзе Nissan у Санкт-Пецярбургу, але сабралі ўсяго 170 экзэмпляраў. Тады ў расіян з кітайцамі нешта не зраслося: машыны так і не паступілі ў вольны продаж, і праект быў закрыты.
У Lada Azimut паўтарыць лёс Lada x-cross 5 шанцаў не шмат, бо гэта не «кітаец» сабраны ў Расіі пад брэндам Lada, а ўласная распрацоўка.
Нагадаем, аўтамабілі маркі Lada займаюць другі радок па аб'ёмах продажаў афіцыйнымі дылерамі ў Беларусі, саступаючы толькі беларуска-кітайскім Geely/Belgee.
Каментары
- Не читайте до обеда советских газет.
- Так ведь других нет.
- Вот никаких и не читайте.