Францыя вырашыла прызнаць Палесцінскую дзяржаву. Ізраіль заявіў, што гэта «ўзнагарода за тэрарызм»
Французскі прэзідэнт Эмануэль Макрон заявіў, што Францыя афіцыйна прызнае Палесцінскую дзяржаву ў верасні на сесіі Генеральнай Асамблеі ААН у Нью-Ёрку, піша Бі-бі-сі.
«Будучы верным свайму гістарычнаму абавязку па забеспячэнні справядлівага і трывалага міру на Блізкім Усходзе, я прыняў рашэнне аб прызнанні Францыяй Дзяржавы Палесціна. Я ўрачыста абвяшчу пра гэта на Генеральнай Асамблеі ААН у верасні гэтага года», — напісаў Макрон у сацыяльнай сетцы X, прыклаўшы да паста ліст кіраўніку Палесцінскай аўтаноміі Махмуду Абасу.
«Неабходна неадкладна ўсталяваць перамір’е, вызваліць усіх закладнікаў і аказаць масіраваную гуманітарную дапамогу насельніцтву Газы. Неабходна таксама гарантаваць дэмілітарызацыю ХАМАС, гарантаваць бяспеку і аднавіць Газу», — дадаў Макрон.
Палесцінскія афіцыйныя асобы віталі рашэнне Макрона, у той час як прэм’ер-міністр Ізраіля Біньямін Нетаньяху заявіў, што гэты крок стане «ўзнагародай за тэрарызм» пасля нападу ХАМАС 7 кастрычніка 2023 года.
«Палесцінская дзяржава ва ўмовах, што склаліся, стане плацдармам для знішчэння Ізраіля, а не для мірнага суіснавання з ім. Палесцінцы не імкнуцца да стварэння дзяржавы побач з Ізраілем, яны імкнуцца да стварэння дзяржавы замест Ізраіля», — гаворыцца ў заяве Нетаньяху.
Кіраўнік МЗС Ізраіля Гідэон Саар назваў рашэнне Макрона абсурдным.
Зараз Палесцінскую дзяржаву прызналі больш за 140 з 193 дзяржаў-членаў ААН. Сярод іх — Расія і Кітай, а таксама некалькі краін Еўрасаюза, у тым ліку Іспанія і Польшча.
ЗША і Вялікабрытанія не прызналі палесцінскую дзяржаву.
Прэм’ер-міністр Вялікабрытаніі Кір Стармер заявіў, што ў пятніцу правядзе экстранныя перамовы з лідарамі Францыі і Германіі, каб абмеркаваць, як «спыніць забойствы ў Газе і забяспечыць людзей прадуктамі, у якіх яны так адчайна маюць патрэбу».
«Мы з’яўляемся сведкамі гуманітарнай катастрофы», — сказаў Стармер.
Па яго словах, дзяржаўнасць «з’яўляецца неад’емным правам палесцінскага народа», а спыненне агню ў Газе «паставіць нас на шлях прызнання палесцінскай дзяржавы».
Дзяржсакратар ЗША Марка Рубіа ў ноч на пятніцу заявіў, што Вашынгтон адхіляе план Макрона аб прызнанні палесцінскай дзяржавы.
«Гэта безадказнае рашэнне толькі служыць прапагандзе ХАМАС і зрывае мірны працэс. Гэта аплявуха ахвярам 7 кастрычніка», — напісаў Рубіа ў сацыяльнай сетцы X.
Каментары