Месенджар Max стаў самым папулярным у Беларусі? Лухта, і вось чаму
Месенджар Max, створаны па загадзе расійскіх улад кампаніяй VK Group, выйшаў у трэнды Google Play у Расіі, Беларусі і ў іншых краінах з вялікай доляй рускамоўнага насельніцтва. Але з водгукамі і адзнакамі не ўсё так проста.
Накрутка для Беларусі і іншых краін пачалася 12 жніўня, у топ праграма выйшла 14 жніўня і дагэтуль там застаецца. У Расіі яго накруцілі ў топ яшчэ раней, у ліпені.
Насамрэч, гэта кажа толькі пра тое, што Расія ўклала велізарныя грошы ў раскрутку месенджара і імітацыю яго папулярнасці. Вось як рос рэйтынг праграмы ў Беларусі — яна паднялася за суткі з канца рэйтынга на 3-е месца, а праз дзень выйшла на першае. За 3 дні Max падняўся на больш, чым 70 пазіцый.
Існуе іншы паказчык — Usage rank, рэйтынг выкарыстання. З дапамогай розных інструментаў сэрвіс SimilarWeb вымярае тое, колькі часу праводзіць чалавек у праграме. Тут у месенджара паказчыкі вельмі сціплыя — нават у Расіі ён на 34 месцы сярод усіх праграм.
Па звестках таго ж SimilarWeb, у Расіі безумоўным лідарам дагэтуль застаецца Telegram. Статыстыка па Беларусі недаступная бясплатна, але паказчыкі будуць супастаўныя.
Рэйтынг у краме Google Play — гэта не вельмі рэлевантны паказчык. Хаця б таму, што яго можна накруціць. Робіцца гэта праз некалькі шляхоў, але найперш — з дапамогай закупкі матываванага трафіку. Існуюць сэрвісы, дзе ў штаце працуюць сотні людзей, якія займаюцца тым, што імітуюць карыстанне праграмай, пакідаюць на яе водгукі і падымаюць ёй рэйтынг і папулярнасць.
Таксама выкарыстаны велізарны адміністратыўны рэсурс. Дзяржслужачых змушаюць пераходзіць у Max. Ён будзе прымусова ўбудаваны ва ўсе смартфоны, якія прадаюцца ў Расіі, з 1 верасня. Змушаюць яго спампоўваць і студэнтаў і школьнікаў, вучэбную камунікацыю якіх прымусова перавялі ў гэты месенджар.
Рэкламуюць Max і расійскія зоркі — блогеры і спевакі, а Ягор Крыд нават інтэграваў рэкламу ў свой новы кліп. Абсурднасць фармулёвак ужо стала мемам — зоркі сцвярджаюць, што ён ловіць «на паркоўцы», «у ліфце» і нават «у моры».
Тое, што рэйтынг накручаны, даказаць няцяжка. Паглядзіце, напрыклад, на дынаміку водгукаў на Google Play. Спачатку іх было зусім няшмат, але з 20-х чыслаў жніўня іхняя колькасць проста неймаверная, больш, чым у Telegram, у якім зарэгістраваныя ў дзясяткі разоў больш людзей з усяго свету.
Можна звярнуць увагу і на адзнакі. З 26 па 31 жніўня пакінулі больш за 90 тысяч водгукаў на месенджар Max і толькі 19 тысяч на нашмат папулярнейшы Telegram.
Значная частка пазітыўных водгукаў відавочна накручаная. У іх людзі хваляць праграму аднатыпнымі фразамі.
Але значная частка водгукаў вельмі негатыўная. Людзі скардзяцца на дрэнную сувязь, нязручнасць, немагчымасць рэгістрацыі, праблемы з функцыяналам. Большасць такіх водгукаў выглядаюць як сапраўдныя.
Значная частка карыстальнікаў таксама перажывае за тое, што праграма можа збіраць іхнія звесткі. Часта выкарыстоўваецца словазлучэнне «шпіёнская праграма».
Падобна, што жыхароў Расіі ў выніку змусяць карыстацца месенджарам для нейкіх патрэбаў, але ён не здолее перабіць канкурэнтаў. Спроба замяніць YouTube на RuTube ці VK Відэа скончылася правалам, нягледзячы на велізарныя грошы, якія былі ўкладзеныя ў праекты. Выглядае так, што месенджар Max чакае той жа лёс.
«Наша Нiва» — бастыён беларушчыны
ПАДТРЫМАЦЬ
Каментары