У Мінску склалі рэйтынг самых дарагіх і танных вуліц. Розніца ў цане значная
Рэйтынг самых дарагіх і найбольш танных вуліц сталіцы і прыгарада склаў рэсурс «Куфар Нерухомасць», прааналізаваўшы тысячы прапаноў і рэальных здзелак, заключаных у 2025 годзе.
Даследаванне паказала, што даражэй за ўсё абыходзяцца кватэры ў новых кварталах, а чакана танней каштуе жыллё за кальцавой, побач з чыгункай і буйнымі заводамі. Розніца ў кошце паміж імі стала двухкратнай, адзначылі прадстаўнікі пляцоўкі, піша Office Life.
Дзе знаходзяцца самыя дарагія вуліцы
Самай дарагой у сталіцы аказалася вуліца Пятра Мсціслаўца ў «Маяку Мінска». Асабліва высока цэняцца кватэры ў першых дамах уздоўж гандлёвага цэнтра. Яны будаваліся раней за іншыя — і забудова там менш шчыльная і менш вышынная. Сярэдні кошт «квадрата» дасягнуў $2681.
Другое месца займае вуліца Макаёнка дзякуючы вышынным дамам каля парку Чалюскінцаў. Цэны на кватэры з відам на парк дасягаюць $2498 за «квадрат».
Патрапіла ў топ-3 і вуліца Бялградская ў «Мінск-Свеце» — $2498 за кв. м.
Радком ніжэй аказалася вуліца братоў Райт у «Новай Баравой», якая знаходзіцца за межамі горада. Але на кошт уплывае блізкасць да інфраструктуры — дзіцячых садкоў, новай паліклінікі і цэнтральнай плошчы. Кватэры там разыходзяцца ў сярэднім па $2476 за кв. м.
Замыкае пяцёрку вуліца Ніколы Тэслы ў «Мінск-Свеце». Тут кватэры на «другасным рынку» каштуюць у сярэднім $2239 за кв. м.
А дзе — самыя танныя
Рэйтынг самых танных вуліц узначаліў прыгарад Мінска — вуліца Акадэміка Красіна ў пасёлку Сосны, дзе сярэдні кошт квадратнага метра складае каля $1300.
На другім радку — вуліца Майская ў Прылуках: у сярэднім $1301 за «квадрат».
А вось на трэцім радку ўжо сталічная вуліца Каржанеўскага ў мікрараёне Курасоўшчына — у сярэднім $1320 за кв. м.
На чацвёртым месцы аказалася вуліца Міхася Лынькова ў Масюкоўшчыне, якая расцягнулася ўздоўж чыгункі. Сярэдні кошт — $1334 за кв. м.
Бюджэтны спіс замыкае вуліца Алега Кашавога, якая звязала Партызанскі праспект з Трактарным заводам, — $1336 за кв. м.
Аўтары рэйтынгу лічаць, што ў Мінску не адчуваецца падзелу на багатыя і бюджэтныя раёны. Усё, як правіла, залежыць ад канцэнтрацыі новабудоўляў або старога жылога фонду. У выніку побач з самай дарагой вуліцай можна знайсці хрушчоўкі з даступным жыллём, а калі перайсці чыгунку, то пачынаецца Лебядзіны з больш дарагой забудовай. Пры гэтым попыт змяшчаецца ў бок дамоў, якія пабудаваныя за апошнія 10‑15 гадоў. У той жа час расце папулярнасць гістарычнай забудовы — кватэры ў сталінках могуць сыходзіць па вельмі высокіх коштах.
У сваю чаргу незалежны эксперт па жылой нерухомасці Наталля Літоўская адзначыла, што ў спіс не патрапілі традыцыйна дарагія вуліцы Мінска — напрыклад, Карла Маркса. Справа ў тым, што здзелак там менш і аналітыкі не змаглі сабраць выбарку для ўключэння ў рэйтынг.
Каментары
Это толпы посторонней публики, узкие подъездные дороги, невозможность припарковаться без боя, шум и загазованность, неудобство инфраструктуры, отсутствие зелени.
В наше время один из важнейших критериев качества района - это отсутствие метро (меньше транзитной публики) и неплотная окружающая застройка (возможность засадить пространство деревами).