«Рэжым Беларусі не першы раз прыдумляе гісторыі». У Літве пракаментавалі гісторыю з дронам у Гродне
Беларусь абвінавачвае Літву ў парушэнні паветранай прасторы праз дрон, які 30 лістапада ўпаў ў Гродне, а перад тым нібыта раскідаў бел-чырвона-белыя сцяжкі. У Літве гэта называюць прыдуманай гісторыяй, піша LRT.
МЗС Беларусі назвала гэты выпадак «наўмыснай правакацыяй» і выклікала часовага паверанага ў справах Літвы Эрыкаса Вілканецаса. Мінск патрабуе ад Літвы падаць падрабязную інфармацыю, правесці расследаванне і прыняць меры, каб падобнае не паўтарылася.
У Літве ж прадстаўнік Нацыянальнага цэнтра кіравання крызісамі Дарыюс Бута не каментаваў, ці сапраўды было парушэнне паветранай прасторы, але адзначыў, што
«рэжым Беларусі не першы раз прыдумляе гісторыі і абвінавачвае заходнія краіны і Літву».
Паводле яго, сапраўдная праблема — гэта пагроза для авіяцыі і грамадства з боку кантрабандных паветраных шараў, якія ляцяць з тэрыторыі Беларусі.
У той жа час прадстаўніца МЗС Літвы Крысціна Белікава заявіла, што пра выклік літоўскага дыпламата яны даведаліся толькі са СМІ. Па яе словах, дыпламат атрымаў афіцыйнае запрашэнне толькі праз гадзіну пасля таго, як з’явіліся паведамленні ў публічнай прасторы.
Літва расцэньвае дзеянні беларускага рэжыму як спробу схаваць сваю шкодніцкую дзейнасць і заклікае Мінск спыніць гібрыдныя атакі супраць краін ЕС, належным чынам кантраляваць сваю тэрыторыю і паветраную прастору, а таксама вярнуць незаконна захопленую маёмасць літоўскім грамадзянам і кампаніям.
Цяпер чытаюць
Сталініста-ябацьку з Гомеля затрымалі пасля таго, як ён запрасіў Лукашэнку на гвалтоўнае закрыццё свайго трэцяга кафэ19
Каментары