Беспілотнікі ўдарылі па прыморскім горадзе Туапсэ на поўдні Расіі ў ноч на сераду, 31 снежня. Пацярпелі два чалавекі.
Пашкоджаны жылыя дамы, прычал у порце і нафтаперапрацоўчы завод, паведаміў аперштаб Краснадарскага краю.
Паводле яго даных, на НПЗ кампаніі «Раснафта» ў выніку атакі пачаўся пажар, які аператыўна патушылі. Пашкоджаны чатыры шматкватэрныя і адзін прыватны жылы дом, а таксама газавая труба ў жылым сектары.
Расійскі Telegram-канал Astra і ўкраінскі Exilenova+ апублікавалі фота магутнага пажару на НПЗ. На іх відаць, што слуп полымя шугае на некалькі метраў. Паводле звестак Telegram-канала Shot, у небе над горадам было чуваць 15—20 выбухаў.
З пачатку вайны Украіна не менш як восем разоў атакавала Туапсінскі НПЗ і экспартны тэрмінал «Раснафты» ў горадзе. Апошні раз — у лістападзе 2025 года. У шэрагу выпадкаў прадпрыемства часова спыняла працу.
Каментары