Аграгарадок Вішнёўка дакладна вядомы ўсім, хто любіць адпачываць на вадасховішчы Вяча. Гэты населены пункт размешчаны за 11 кіламетраў ад сталіцы і пакуль што тут жыве менш за тысячу чалавек. Аднак у найбліжэйшыя гады ўсё можа змяніцца. У Вішнёўцы плануецца пабудаваць новыя жылыя дамы, школу і грамадскія аб’екты. Усяго тут хочуць узвесці амаль 500 новых кватэр. Напэўна — з разлікам на мінчукоў, гатовых пераехаць у прыгарад. Зараз праект забудовы выстаўлены на грамадскае абмеркаванне, піша Realt.by.
Праводзіць грамадскае абмеркаванне генеральнага плана і ПДП (плана дэталёвай планіроўкі) жылой зоны Вішнёўкі Мінскі райвыканкам. Да ўдзелу запрашаюцца ўсе зацікаўленыя асобы (асабліва — тыя, хто жыве ў аграгарадку Вішнёўка і яго ваколіцах). Мэта праекта — стварыць сучасны, камфортны і прывабны для жыцця населены пункт.
Вішнёўка размешчана ў Папярнянскім сельсавеце Мінскага раёна, за 11 кіламетраз ад сталіцы. Побач праходзяць МКАД-2 і аўтамабільная дарога Р-58, якая вядзе ў Мядзел. Зараз у аграгарадку жыве каля 950 чалавек. Населены пункт складаецца з прыватных дамоў і некалькіх двухпавярховых будынкаў. З інфраструктуры тут ёсць пачатковая школа, яслі-сад, амбулаторыя, аддзяленне сувязі, магазін, прыдарожна-гатэльны комплекс, кавярня і АЗС.
Дзе з’явіцца новае жыллё?
Галоўныя змены закрануць паўднёва-ўсходнюю частку аграгарадка. На першым этапе (да 2030 года) шматкватэрныя новабудоўлі могуць вырасці ў раёне скрыжавання вуліц Цэнтральнай і Праектаванай № 1. На другім этапе (да 2040 года) жылыя дамы пачнуць будаваць уздоўж вуліцы Праектаванай № 1, а таксама ў раёне скрыжавання Цэнтральнай і Маладзёжнай. Зараз тут размешчаная пачатковая школа, якую плануецца рэканструяваць пад змяшаную грамадска-жылую забудову.
Новыя сядзібы (магчыма — таўнхаўсы) у аграгарадку таксама з’явяцца. Прыватныя дамы могуць размясціць на вуліцы Школьнай, уздоўж вуліцы Прыазёрнай і на працягу ўчастка праектаванай вуліцы Будаўнікоў. Некаторыя наяўныя кварталы сядзібнай забудовы чакае ўшчыльненне. Яно можа закрануць завулак Лермантава, вуліцы Палявую і Чэхава.
Паводле планаў горадабудаўнікоў, усяго ў Вішнёўцы будзе пабудавана больш за 500 новых кватэр і сядзіб. Разлік, хутчэй за ўсё, зроблены на мінчукоў. Але каму менавіта прапануюць жыллё побач з вадасховішчам Вяча — пакуль невядома.
Магчыма, будаўніцтвам зоймуцца сталічныя дэвелаперы, гатовыя пры адсутнасці свабодных пляцовак у Мінску ўкласціся ў прыгарад.Таксама не выключаны варыянт і з будаўніцтвам жылля для тых, хто стаіць у чарзе. У такім выпадку дамы будуць узводзіць дзяржаўныя арганізацыі.
На першым этапе плануецца пабудаваць 165 кватэр і дамоў сядзібнага тыпу, на другім — яшчэ 248 кватэр і сядзіб. У цэлым аб’ём новага жыллёвага будаўніцтва складзе 33 тысячы квадратных метраў. Сюды ўвойдзе як шматкватэрная забудова (72,9%), так і сядзібная (27,1%).
А што будзе з інфраструктурай?
На першым этапе ў Вішнёўцы плануецца пабудаваць новую школу на 502 месцы, гандлёвы аб’ект плошчай каля 600 квадратных метраў і аб’ект грамадскага харчавання на 30 пасадачных месцаў. Установа адукацыі з’явіцца ў раёне скрыжавання вуліц Цэнтральнай і Будаўнічай.
Таксама горадабудаўнікі абяцаюць прадумаць азеляненне — упарадкаваць тэрыторыю каля вадасховішча, абнавіць наяўныя і стварыць новыя паркі, скверы і бульвары.
Што тычыцца колькасці насельніцтва Вішнёўкі, то яна будзе расці паступова. На першым этапе (да 2030 года) колькасць жыхароў павялічыцца з 950 да 1350 чалавек. На другім (да 2040 года) дасягне амаль 2000 чалавек.
Матэрыялы праекта (схемы і апісанне) у добрай якасці выкладзеныя на сайце Мінскага райвыканкама. Грамадскае абмеркаванне праекта праходзіць з 26 студзеня па 9 лютага ў Папярнянскім сельвыканкаме (аграгарадок Бальшавік, вул. Фабрычная, 6). Там жа 4 лютага ў 18:00 адбудзецца прэзентацыя і сустрэча з мясцовымі жыхарамі.
Цяпер чытаюць
Цэны на паліва павышаюцца на 4 капейкі, а праз тыдзень яшчэ на тры1
Каментары