Іран афіцыйна пацвердзіў гібель аяталы Алі Хаменеі. Абвешчана 40‑дзённая жалоба
Іранскае дзяржаўнае інфармацыйнае агенцтва IRNA ноччу 1 сакавіка выступіла з афіцыйнай заявай аб гібелі Вярхоўнага лідара краіны аяталы Алі Хаменеі. Улады Ірана назвалі тое, што здарылася, жорсткім нападам злачынных рэжымаў, абвясцілі ў краіне саракадзённую жалобу, сем дзён афіцыйных выхадных, а таксама паабяцалі адказ ЗША і Ізраілю.
«З глыбокім жалем і смуткам паведамляем вам, што ў выніку жорсткага нападу злачыннага ўрада Амерыкі і злавеснага сіянісцкага рэжыму, узор веры, джыхаду і супраціву, Вярхоўны лідар Ісламскай рэвалюцыі, яго святасць аятала Алі Хаменеі прыняў пакутніцкую смерць», — гаворыцца ў паведамленні.
У краіне абвясцілі 40 дзён жалобы і сем дзён афіцыйных выхадных.
Алі Хаменеі, якому было 86 гадоў, займаў пасаду найвышэйшага кіраўніка Ірана з 1989 года. Ён валодаў абсалютнай уладай, якая перавышае паўнамоцтвы прэзідэнта. Ён непасрэдна кантраляваў армію, спецслужбы, судовую сістэму і Корпус вартавых ісламскай рэвалюцыі (КВІР).
У афіцыйным паведамленні дзяржаўных СМІ Хаменеі называюць узорам веры і супраціву, які больш за 37 гадоў узначальваў ісламскі фронт супраць тыраніі.
Іранскае інфармагенцтва IRNA таксама пацвердзіла гібель саветніка забітага Алі Хаменеі — сакратара Савета па абароне Ірана Алі Шамхані, а таксама камандуючага іранскім Корпусам вартавых Ісламскай рэвалюцыі Махамада Пакпура.
Прэзідэнт Ірана Масуд Пезешкіян у апублікаванай заяве паабяцаў адпомсціць за смерць Хаменеі. «Гэтым разам мы з усёй сілай і цвёрдасцю прымусім выканаўцаў і заказчыкаў гэтага вялікага злачынства пашкадаваць», — запэўніў ён.
Доўгі час іранскі бок адмаўляў смерць Хаменеі.
У суботу вечарам пра яго ліквідацыю спачатку паведамілі міжнародныя агенцтвы са спасылкай на ізраільскіх чыноўнікаў, а затым адпаведную заяву зрабіў прэзідэнт ЗША Дональд Трамп. Тэгеран да апошняга моманту абвяргаў гэтыя звесткі.
На фоне афіцыйнай жалобы ў сацыяльных сетках пачалі распаўсюджвацца відэакадры, на якіх жыхары розных іранскіх гарадоў святкуюць смерць кіраўніка.
Іранскія дзяржаўныя СМІ публікуюць шматтысячныя натоўпы, што гаруюць праз смерць Хаменеі.
Ваенная аперацыя ЗША і Ізраіля пачалася раніцай у суботу і была накіравана на знішчэнне ваенных аб’ектаў і ключавых фігур сілавых структур Ірана.
У адказ на гэтыя дзеянні Тэгеран здзейсніў масіраваны абстрэл з выкарыстаннем ракет і дронаў. Пад удар трапіў не толькі Ізраіль, але і суседнія краіны Персідскага заліва. Асноўнымі мішэнямі іранскіх вайскоўцаў сталі амерыканскія базы, аднак у выніку пацярпелі і цывільныя аб’екты: жылыя дамы, гатэлі і аэрапорты ў рэгіёне.
Цяпер чытаюць
Больш за 60 чалавек затрыманыя пасля канцэрта Макса Каржа ў Франкфурце-на-Майне. Са сцэны спявак заклікаў спыніць вайну ва Украіне7
Каментары
Пішы, дзядуля, тэстамэнт. Ты - наступны.