На Чыгірынскім вадасховішчы рыбакі замест рыбы дасталі з вады тое, чаго зусім не чакалі
Усе прысутныя былі ўпэўненыя: на кручок трапіўся гіганцкі шчупак вагой пад 20 кілаграмаў.
Незвычайны выпадак адбыўся 27 лютага падчас закрыцця сезона зімовай рыбалкі на шчупака. Рыбаловы, якія спадзяваліся на багаты ўлоў, сутыкнуліся з сапраўдным лясным драпежнікам — жывой выдрай, якая паквапілася на прынаду, піша FishingBY.
Усё пачалося на досвітку, калі каманда рыбакоў расставіла жэрліцы на лёдзе Чыгірынскага вадасховішча. Увесь дзень прайшоў абсалютна ціха, і толькі пад вечар спрацаваў адзіны сцяжок.
Катушка пачала імкліва круціцца, і ўсе прысутныя былі ўпэўненыя: на кручку — гіганцкі шчупак вагой пад 20 кілаграмаў. Да палонкі збегліся суседзі па лёдзе, каб паглядзець на рэдкую здабычу.
Аднак замест рыбы з вады паказалася галава звера. Выявілася, што жыўца схапіла трохкілаграмовая выдра.
Рыбакі не хавалі свайго здзіўлення, бо такі клёў бывае раз на жыццё. Нягледзячы на небяспеку (выдра — зубасты і спрытны драпежнік), рыбакі змаглі акуратна вызваліць жывёлу ад кручка.
Гісторыя скончылася хэпі-эндам: пасля кароткай відэаздымкі на памяць выдру адпусцілі на волю. Хоць трафейнага шчупака ў той дзень так і не злавілі, рыбакі прызналіся, што эмоцыі ад сустрэчы са зверам зрабілі гэтае закрыццё сезона незабыўным.
Цяпер чытаюць
«Жэня пагадзіўся на будоўлю, а не ваяваць. І толькі калі выйдзе з запою!»: як прадалі ў расійскую армію жыхара Лёзна. Ахвяра не адна6
Каментары
[Зрэдагавана]