Валанцёра пошукавых атрадаў і кіроўцу грузавіка, які раней працаваў у ЗША, асудзілі па справе Гаюна
Марк Верашчагін працаваў на фурах у Амерыцы і шукаў зніклых людзей у Беларусі разам з атрадам «Сімуран».
Марку Верашчагіну 29 гадоў. Ён родам з вёскі Тухавічы Ляхавіцкага раёна Брэсцкай вобласці. Па прафесіі мужчына — дальнабойшчык і машыніст аўтакрана, нейкі час працаваў і таксістам.
З ягоных паведамленняў у сацсетках вядома, што ён паспеў пабачыць суровыя ўмовы на фурах, калі працаваў на Урале, у Казахстане і на расійскай Поўначы, дзе даводзілася мяняць колы пры мінус 40 градусах.
У пачатку вайны, у 2022 годзе, Марк жыў у Мазыры.
Акрамя працы, Марк дапамагаў пошукава-выратавальнаму атраду «Сімуран»: каардынаваў пошукі і арганізоўваў транспарт. Ён паўдзельнічаў у дзясятках пошукавых аперацыяў.
На мяжы 2022 і 2023 года Марк паехаў працаваць на фуры ў ЗША, але пазней вярнуўся ў Беларусь. Восенню 2025 года праз пагаршэнне сітуацыі ў грузаперавозках мужчына сеў за руль арэнднага таксі ў Баранавічах. Ён вярнуўся ў гэтую сферу пасля пяцігадовага перапынку.
Верашчагін знік з сацсетак раніцай 7 кастрычніка 2025 года. Імаверна, тады яго і затрымалі. У выніку Брэсцкі абласны суд асудзіў Марка паводле частак 1 і 2 артыкула 361‑4 КК (садзейнічанне экстрэмісцкай дзейнасці). Звычайна гэта азначае, што чалавек праходзіў па справе Гаюна.
Марку прысудзілі хатнюю хімію.
«Наша Нiва» — бастыён беларушчыны
ПАДТРЫМАЦЬЦяпер чытаюць
Галоўная рэдактарка гомельскай раёнкі пакаялася за тое, што абвінаваціла гурт «Дразды»9
Каментары