Тры пасажыры круізнага лайнера ў Атлантыцы загінулі, імаверна, у выніку ўспышкі загадкавага віруса
Што гэта за хантавірус?
Сусветная арганізацыя аховы здароўя паведаміла пра гібель трох пасажыраў круізнага лайнера, які перасякаў Атлантыку, у выніку ўспышкі захворвання, у тым ліку пацверджанага выпадку хантавіруса — рэдкай, але патэнцыйна цяжкай інфекцыі, піша «Дождь» са спасылкай на France 24.
Успышка адбылася на судне MV Hondius, якое накіроўвалася з Ушуая (Аргенціна) на Каба-Вердэ.
Раней у нядзелю Міністэрства аховы здароўя Паўднёвай Афрыкі паведаміла агенцтву AFP пра ўспышку «цяжкага вострага рэспіраторнага захворвання», у выніку якога загінулі як мінімум два чалавекі, а трэці знаходзіцца ў рэанімацыі ў Ёханэсбургу.
У пацыента, які праходзіў лячэнне ў Ёханэсбургу, быў выяўлены хантавірус — сямейства вірусаў, што выклікаюць гемарагічную ліхаманку, паведаміў прадстаўнік Міністэрства аховы здароўя ПАР Фостэр Махале.
«На сёння лабараторна пацверджаны адзін выпадак заражэння хантавірусам, і яшчэ пяць выпадкаў знаходзяцца пад падазрэннем», — паведаміла Сусветная арганізацыя аховы здароўя агенцтву AFP.
«З шасці пацярпелых трое памерлі, а адзін цяпер знаходзіцца ў рэанімацыі ў Паўднёвай Афрыцы».
У сваёй заяве СААЗ адзначыла, што заражэнне хантавірусам «звычайна звязана з уздзеяннем навакольнага асяроддзя (кантакт з мачой або фекаліямі заражаных грызуноў)».
«Хоць гэта і рэдкасць, хантавірус можа перадавацца ад чалавека да чалавека і прыводзіць да цяжкіх рэспіраторных захворванняў, якія патрабуюць пільнага назірання за пацыентам, аказання неабходнай падтрымкі і своечасовага рэагавання».
Вядома, што сярод загінулых была сямейная пара (70 і 69 гадоў) з Нідэрландаў.
Зараз лайнер MV Hondius, на борце якога каля 170 пасажыраў і 70 членаў экіпажа, знаходзіцца каля порта Прая — сталіцы Каба-Вердэ. Медыкі вырашаюць пытанне пра магчымую ізаляцыю яшчэ двух хворых турыстаў у мясцовай клініцы.
Асобнай вакцыны і супрацьвірусных прэпаратаў ад хантавіруса няма — медыкі могуць толькі падтрымліваць жыццё пацыента: падключаць да апаратаў штучнай вентыляцыі лёгкіх, ставіць кропельніцы. Смяротнасць пры цяжкай лёгачнай форме дасягае 40%, а ад першых прыкмет хваробы да смерці часам праходзіць усяго некалькі сутак.
Каментары