У Венесуэле ў выніку землятрусу — больш за 200 загінулых, тысячы людзей лічацца зніклымі без вестак
У выніку двух разбуральных землятрусаў у Венесуэле загінулі як мінімум 235 чалавек, паведаміў міністр аховы здароўя краіны Карлас Альварада. Колькасць ахвяр працягвае расці, а тысячы людзей па-ранейшаму лічацца зніклымі без вестак, піша Бі-бі-сі.
Паводле слоў старшыні Нацыянальнай асамблеі краіны Хорхе Радрыгеса, 1520 чалавек атрымалі раненні, каля 200 застаюцца пад заваламі. Акрамя таго, стыхія цалкам пазбавіла жылля не менш як 2927 сем'яў, адзначыў Радрыгес.
В.а. прэзідэнта Венесуэлы Дэлсі Радрыгес раней абвясціла ў краіне надзвычайнае становішча. Яна таксама паведаміла пра закрыццё міжнароднага аэрапорта Каракаса.
Два моцныя падземныя штуршкі магнітудай 7,2 і 7,5 адбыліся ўвечары ў сераду на захад ад сталіцы Венесуэлы. Другі падземны штуршок стаў наймацнейшым з 1900 года, паведамляе USGS. Пасля яго адбылося яшчэ 138 афтаршокаў.
Старшыня Нацыянальнай асамблеі Хорхе Радрыгес таксама паведаміў, што 250 будынкаў былі разбураныя або атрымалі сур'ёзныя пашкоджанні, прычым найбольшыя страты панёс штат Ла-Гуайра на поўнач ад Каракаса.
Выступаючы па нацыянальным тэлебачанні, Хорхе Радрыгес заявіў, што Венесуэла сутыкнулася з «сур'ёзнымі перабоямі» ў працы інфраструктуры і жыццёва важных службаў.
«Верагодныя вялікія чалавечыя страты і маштабныя разбурэнні, а сама катастрофа, хутчэй за ўсё, мае шырокамаштабны характар», — заявіла Геалагічная служба ЗША, адзначыўшы, што паводле папярэдніх ацэнак колькасць загінулых можа скласці ад 10 да 100 тысяч чалавек.
Многія венесуэльцы падчас землетрасення знаходзіліся дома — у гэты дзень краіна адзначала гадавіну бітвы пры Карабоба (1821), калі войска Сімона Балівара атрымала перамогу над іспанскімі войскамі і забяспечыла незалежнасць Венесуэлы.
Многія жыхары Каракаса, якія выбеглі на вуліцу, узгадвалі папярэдняе разбуральнае землетрасенне, што адбылося ў 1967 годзе. Тады ў двух раёнах Каракаса — Палас-Грандэс і Альтаміра — абрынуліся жылыя дамы. У агульнай колькасці загінулі больш за 200 чалавек.
Кіраўнік МУС Дыясдада Кабельё згадаў менавіта гэтыя два раёны, калі ў эфіры дзяржаўнага тэлебачання расказваў пра разбураныя будынкі. Паводле яго слоў, землетрасенне таксама адчувалася ў штатах Трухільё, Яракуй, Карабоба, Арагуа, Міранда і Ла-Гуайра.
Улады іншых краін амерыканскага кантынента выказваюць спачуванні і прапануюць Венесуэле сваю падтрымку. Сярод іх і прэзідэнт ЗША Дональд Трамп.
«Два магутныя землетрасенні, якія толькі што абрынуліся на вялікі народ Венесуэлы, маюць велізарны маштаб і ўжо забралі мноства чалавечых жыццяў. Злучаныя Штаты гатовыя, жадаюць і здольныя дапамагчы! Я даручыў усім ведамствам нашага ўрада падрыхтавацца да аператыўных дзеянняў. Мы будзем побач з нашымі новымі і вялікімі сябрамі», — напісаў ён у сацыяльнай сетцы Truth Social.
Мінчанка Ангеліна, якая прасіла ў Лукашэнкі кватэру за тройню, атрымала жыллё18
Каментары