У Расіі хацелі наняць дворнікаў з КНДР, але «не пацягнулі па зарплаце»
Кіраўнік Арэнбурга Альберт Юмадзілаў заявіў, што гарадскія ўлады планавалі прыцягнуць да прыбірання вуліц грамадзян Паўночнай Карэі, аднак сутыкнуліся з непераадольным фінансавым бар’ерам. Камунальнікі з КНДР адмовіліся працаваць за прапанаваныя 55 тысяч расійскіх рублёў (гэта 2000 беларускіх).
«Наколькі я ведаю, рабочыя з Паўночнай Карэі на 55 тысяч не паедуць. Там узровень заработнай платы ў 2—3 разы большы. Зразумела, у іх і КПД большы, яны працуюць як робаты, я бачыў на свае вочы… Але мы проста па зарплаце не пацягнем», — цытуе Юмадзілава мясцовы партал 1743.ru.
Затое ў горадзе паспяхова прыжыўся іншы эксперымент — з рабочымі з Сенегала. Першыя 10 афрыканскіх дворнікаў з'явіліся ў Арэнбургу ў красавіку, цяпер іх колькасць вырасла да 31, і чакаецца прыезд яшчэ чатырох. Мэр вельмі задаволены іх працай: сенегальцы бяруць не больш за мясцовых, але гатовыя выконваць самую цяжкую і брудную працу, выходзіць на змены па суботах і нядзелях.
Расія актыўна вярнулася да практыкі найму паўночнакарэйцаў у абыход санкцый ААН. Аднак, паводле дадзеных расследавальнікаў, заробак рабочых з КНДР ідзе наўпрост дзяржаве, самі яны ўтрымліваюцца ў РФ у рабскіх умовах пад наглядам спецслужб, а сваю долю грошай могуць атрымаць толькі пасля вяртання на радзіму.
Цяпер чытаюць
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам5555
Каментары