Беларускі бізнэс просіць улады дапамагчы пацярпелым прадаўцам Wildberries
Каля 22 тысяч беларускіх кампаній і прадпрымальнікаў апынуліся пад пагрозай велізарных страт праз пажары на расійскіх складах Wildberries. Паколькі маркетплейс можа паспрабаваць спісаць усё на форс-мажор, айчынны бізнэс заклікае Мінэканомікі ўмяшацца на найвышэйшым узроўні і праз дыпламатычныя каналы прымусіць гіганта рытэйлу выплаціць кампенсацыі.
Мінскі сталічны саюз прадпрымальнікаў і працадаўцаў звярнуўся да першага намесніка міністра эканомікі Івана Вежнаўца з просьбай тэрмінова арганізаваць сумесную працоўную нараду і выпрацаваць план дзеянняў па абароне беларускага бізнэсу.
Сваю пазіцыю саюз аргументуе тым, што на складах маркетплейса ў Расіі захоўваюць сваю прадукцыю больш за 22 тысячы суб'ектаў гаспадарання Рэспублікі Беларусь, і наступствы пажараў ствараюць істотную пагрозу для беларускай эканомікі.
Юрыдычна адмова ў выплаце кампенсацый не мае падстаў, даводзяць прадпрымальнікі, бо беларускія прадаўцы заключалі аферту з мясцовай юрыдычнай асобай ТАА «ІМВБРБ». У сувязі з гэтым «спробы спасылацца на пажары на тэрыторыі Расійскай Федэрацыі не могуць разглядацца як падстава для адмовы ў кампенсацыі на падставе абставін неадольнай сілы», лічаць аўтары звароту.
Паколькі тавары перадаваліся на падставе дамоваў паміж самім Wildberries і ўладальнікамі складоў, «беларускія суб'екты гаспадарання-прадаўцы не маюць ніякай магчымасці ўплываць на захаванасць сваіх тавараў» і не нясуць за гэта адказнасці.
Зараз эксперты саюза ўжо выпрацавалі план дасудовай фіксацыі страт і рыхтуюць глебу для «калектыўнай судовай абароны», калі маркетплейс адмовіцца пакрываць шкоду мірным шляхам.
«Улічваючы неадназначную сітуацыю… эксперты прыйшлі да высновы аб неабходнасці аб'яднання намаганняў дзелавой супольнасці і кампетэнтных органаў дзяржаўнага кіравання… Час і высокі ўзровень каардынацыі намаганняў у дадзеным выпадку граюць вырашальную ролю», — даводзяць прадпрымальнікі.
Цяпер чытаюць
Трагедыя з 30‑гадовай доктаркай са Старобіна — пайшла выдаляць зуб мудрасці і памерла3
Каментары