Дзмітрый Кісялёў не адчувае віны за тое, што адбылося на Данбасе
У Мінск прыехаў гендырэктар МІА «Россия Сегодня», вядомы прапагандыст Дзмітрый Кісялёў. Учора ён сустрэўся з міністрам замежных спраў Уладзімірам Макеем, а сёння ў Доме Масквы прайшла яго сустрэча з журналістамі. У сустрэчы ўзяла ўдзел міністр інфармацыі Беларусі Лілія Ананіч.
«Мы працуем у Беларусі даўно, а сёння проста адкрываем новую прастору [беларускі партал «Спутнік» уваходзіць у структуру «Россия сегодня»], — сказаў Дзмітрый Кісялёў. — Мэты прысутнасці ў Беларусі не адрозніваюцца ад мэтаў працы ў свеце — фарміраванне справядлівага вобразу Расіі. Але ў дачыненні Беларусі ёсць адна карэкціроўка — у нас Саюзная дзяржава, як раз у гэтыя дні мы адзначаем яе юбілей, таму і ўяўленні пра наш саюз таксама маюць быць справядлівымі. Мы сябе не аддзяляем ад братэрскага беларускага народу. Хочам, каб у вас была магчымасць развівацца без перашкод звонку», — даказваў Кісялёў.
Лілія Ананіч у сваю чаргу запэўніла госця, што, на яе думку, беларусаў і рускіх «звязваюць тысячагадовыя карані сваяцтва» і таксама дадала, што яе ведамства разам з Міністэрствам сувязі Расіі распрацоўвае план стварэння супольнай інфармацыйнай прасторы Саюзнай дзяржавы, які, маўляў, будзе прыняты на ўзроўні рады міністраў Саюзнай дзяржавы.
Потым міністарка Ананіч і Кісялёў пачалі адказваць на пытанні з залы.
Задаў пытанне Кісялёву і журналіст «Нашай Нівы». У Беларусі заведзена 135 крымінальных спраў на грамадзян, што бралі ўдзел у баявых дзеяннях ва Украіне, сказаў ён. Некторыя хлопцы, што ваявалі за ДНР, прызналі у інтэрв'ю «НН», што адправіліся ваяваць пад уздзеяннем праграм тэлеканала «Расія», некаторых з іх ужо няма ў жывых. Ці адчуваеце вы віну за датычнасць да смерці гэтых людзей, а таксама за паламаныя лёсы тых, хто цяперака не можа вярнуцца на радзіму праз крымінальны пераслед, — спыталіся мы.
Кісялёў у адказ сказаў, што не адчувае віны за «грамадзянскі пераварот» ва Украіне, за «касетныя бомбы, што скідаў кіеўскі рэжым на мірныя голавы данецкіх грамадзян», за «катаванні, што ладзілі нацыкі з карных батальёнаў» і за развязаную грамадзянскую вайну. Ён таксама дадаў, што ў карэспандэнта «Нашай Нівы» сумбур у галаве.
Журналістка «Народнай волі» спыталася ў Кісялёва, ці не баіцца ён, што «Спутнік-Беларусь» паўторыць лёс латвійскага аддзялення агенцтва, якое зачынілі. Маўляў, пасля расійскага ўварвання ва Украіну і ў Беларусі збіралі подпісы за абмежаванне паказу навінаў расійскіх каналаў, што насаджаюць ідэалогію г.зв. рускага свету.
«Дай бог здароўя рускаму свету, дзякуй богу, што мы жывем у ім, — сказаў у адказ Кісялёў, — Ён аказвае «облагоражіваюшчее воздействіе» на цывілізацыю, што відаць у Сірыі і іншых месцах. А ў Латвіі закрылі «Спутнік», бо баяцца свабоды слова».
Адказваючы на наступнае пытанне радыё «Свабода», Кісялёў абрынуўся на «Свабоду» з крытыкай. Сказаў, што «Свабода» займаецца бруднай журналістыкай, супраць якой выступае «Россія сегодня». А ўся рэч у тым, што «Свабода» спытала пра афшоры Пуціна. Па сутнасці ж Кісялёў сказаў, што «давярае прэзідэнту».
У сваю чаргу, міністр інфармацыі Беларусі Лілія Ананіч зазначыла, што галоўнае, каб журналістыка заставалася чэснай і неперадузятай, бо ў час інтэрнэту праўда абавязкова вылезе. Не напіша адзін, дык напіша другі, сказала яна.
Фота Ірыны Арахоўскай.
«На Захадзе вобраз Беларусі складаецца са штампаў, гэта прымітыўны вобраз», — перакананы Кісялёў. А «Спутнік» будзе прасоўваць яе пазітыўны вобраз, запэўніў ён.
Таксама ў расійскага прапагандыста запыталіся, якую пазіцыю зойме «Спутнік», калі паміж Беларуссю і Расіяй адбудзецца інфармацыйная вайна кшталту тых, што ўжо бывалі.
Кісялёў у адказ сказаў, што не займаецца інфармацыйнымі войнамі. Цягам канферэнцыі ён увогуле вельмі часта называў сябе «журналістам» і ўсяляк імкнуўся гэта падкрэсліць.
«Інфармацыйнымі войнамі займаюцца ЗША, а не мы», — сказаў Кісялёў.
У сваю чаргу Ананіч запэўніла, што, як міністр, будзе рабіць усё, «каб не дапусціць інфармацыйнай вайны паміж Беларуссю і Расіяй».
Пасол Расіі ў Беларусі Аляксандр Сурыкаў. Фота Ірыны Арахоўскай.
Што за 17-гадовы стартапер, які выліў цэбар хлусні на Лібера на радасць беларускім спецслужбам7
Каментары