Андрэй Касьціцын — найлепшы беларускі хакеіст сэзону

Паводле штогадовага апытаньня найбуйнейшай спартовай газэты краіны «Прессбол» найлепшым хакеіст сэзону 2007/2008 названы форвард «Манрэаль Канадыянс» Андрэй Касьціцын. У апытаньні ўзялі ўдзел хакейныя спэцыялісты краіны, а таксама спартовыя журналісты.

Касьціцын старэйшы набраў ажно 524 пункты, апярэдзіўшы другога ляўрэата абаронцу «Каларада Эвэланш» Руслана Салея ажно на 305 балаў. Трэцяе месца ў апытаньні заняў малодшы брат і аднаклюбнік Андрэя Касьціцына Сяргей.

Андрэй Касьціцын прызнаны найлепшым хакеістам Беларусі ўпершыню. Паводле «Прессболу», нападнік зборнай праводзіць свой адпачынак разам з жонкай і дачкой у родным Наваполацку. Па ўсім бачна, што клюбную прапіску Андрэй мяняць не зьбіраецца, але яго чакае перазаключэньне кантракту з «Манрэалем» на больш выгадныя ўмовы. Таксама Касьціцын-старэйшы выказаў задаволенасьць вяртаньне на трэнэрскі мосьцік зборнай канадца Глена Хэнлана.

Нагадаем, што летась найлепшым хакеістам Беларусі быў названы форвард падмаскоўнага МВД Алег Антоненка.

Зьміцер Панкавец

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ