Падчас ваеннай дыктатуры 1976‑1983 Мэнэндэс, якому зараз 80 гадоў, камандаваў трэцім армейскім корпусам у Кордабе. Ён таксама адказваў за сьледчыя ізалятары і турмы, у якіх утрымліваліся палітычныя зьняволеныя.
Былы ваенны асуджаны на пажыцьцёвае зьняволеньне за катаваньні і забойства чатырох актывістаў Рэвалюцыйнай рабочай партыі Хілды Паласіяс, Карласа Лаха, Рубэна Кардоса, Умбэрта Брандалізі.
Яны прапалі бязь зьвестак 15 сьнежня 1977 г. Яны былі скрадзеныя ваенным рэжымам, зьмешчаныя ў турму і пасьля месяцу допытаў і катаваньняў забітыя. Пазьней целы палітвязьняў былі выкінутыя на вуліцу, каб падаць абставіны іх сьмерці так, што быццам яны загінулі ў вулічных баях.
Суд не ўзяў пад увагу ўзрост генэрала — паводле аргентынскіх законаў, людзям старэй за 70 год, турэмнае зьняволеньне замяняецца хатнім арыштам.
Такі ж вэрдыкт быў вынесены і ў дачыненьні да чатырох шараговых удзельнікаў хунты, яшчэ трое былі асуджаныя да турэмных тэрмінаў ад 18 да 22 гадоў.
Прыгавор быў сустрэты гучнымі аплядысмэнтамі людзей, што сабраліся ля будынка суда.