Аўтазакі і затрыманні на вуліцах: гэтым адзначылася свята 3 Ліпеня ў Брэсце. У акцыі пратэсту прынялі ўдзел каля 50 чалавек.
Праціўнікі Лукашэнкі самаарганізаваліся ў сацыяльных сетках і тэлеграм-каналах, каб сабрацца на вуліцах і апладзіраваць. У адзначаныя месцы ўлады накіравалі аўтазакі і АМАП.
Людзі апладзіруюць разам на вуліцы Леніна насупраць будынка КДБ:
Затрыманні адбыліся на вуліцы Леніна — рух па ёй быў часткова перакрыты, на вуліцы Савецкай і ў гарадскім парку.
У сацсетках кружаць відэа і фота. На некаторых з іх відаць, як мужчыну затрымліваюць на вачах у жанчыны з дачкой, жанчына сароміць міліцыянтаў:
Людзі разбягаюцца па вуліцы Міцкевіча:
Каля 18.00 удзельнікі акцыі сабраліся каля сцэны ля тэатра эстрады ў гарадскім парку, дзе праходзіў святочны канцэрт да Дня Незалежнасці, піша Tut.by.
Прыкладна ў 18.15 АМАП ужо затрымаў першага чалавека. Міліцыянты падышлі да кампаніі маладых людзей, якія сядзелі на лавачцы каля сцэны, вывелі аднаго з хлопцаў і пасадзілі яго ў мікрааўтобус, прыпаркаваны на вуліцы Леванеўскага.
Прыкладна ў 18.45 удзельнікі акцыі сышлі ад сцэны і сабраліся ля ўваходу ў гарадскі парк. Там яны прастаялі да 19.20, а затым калонай пайшлі па вуліцы Леніна. У шэсці ўдзельнічалі каля 50 чалавек. Людзі не выкрыквалі лозунгаў. Яны ішлі і пляскалі ў ладкі.
Калона перайшла скрыжаванне з вуліцай Міцкевіча і пайшла далей у напрамку Гогаля. Каля крамы «Вінар» да калоны пад'ехала некалькі мікрааўтобусаў. З іх выбеглі супрацоўнікі АМАПу і затрымалі пецярых чалавек.
Частка ўдзельнікаў акцыі пасля гэтага пайшла далей па вуліцы Леніна. Астатнія вярнуліся на вуліцу Міцкевіча і рассеяліся па дварах і суседніх вуліцах.
Пасля гэтага мікрааўтобусы АМАПа кружылі па квартале, не даючы людзям сабрацца ў вялікія групы.
Паводле папярэдняй інфармацыі, за час акцыі затрымалі шэсць чалавек. Куды іх даставілі — зараз удакладняецца.
