Банкам Беларусі неабходна прыняць дадатковыя меры па павышэнню прывабнасці ўкладаў з працяглымі тэрмінамі. Такое меркаванне выказала старшыня праўлення Нацыянальнага банка Надзея Ермакова ў дакладзе на пашыраным пасяджэнні праўлення, апублікаваным у часопісе Нацбанка «Банковский вестник».

«Для павышэння рэсурснага патэнцыялу банкам неабходна прыкласці максімум намаганняў па прыцягненні чаканага прыросту грашовых даходаў насельніцтва ў тэрміновыя банкаўскія ўклады. Пры гэтым асаблівую ўвагу варта ўдзяліць структуры прыцягнутых дэпазітаў па тэрмінах. Неабходна прыняць дадатковыя меры па павышэнню прывабнасці ўкладаў з працяглымі тэрмінамі, у тым ліку мэтазгодна павялічваць розніцу паміж працэнтнымі стаўкамі па доўгатэрміновых і кароткатэрміновых дэпазітах», — гаворыцца ў дакладзе кіраўніка Нацбанка.

Надзея Ермакова агучыла і іншыя рэкамендацыі для банкаўскага сектара рэспублікі. У тым ліку кіраўнік Нацбанка нагадала аб сацыяльнай адказнасці банкаў. «За кліентам неабходна бачыць чалавека, шматдзетную сям’ю, рэальнае жыццё, калі трэба, дапамагаць кліентам адэкватна ацаніць сваю плацежаздольнасць, правільна сфармуляваць свае патрэбнасці, зразумець меру адказнасці перад банкам. У канчатковым выніку гэта дапамога прывядзе да павышэння дабрабыту асобнага кліента, яго сям’і і, значыць, грамадства ў цэлым, а банку — дасць магчымасць набыць стабільнага кліента», — сказала яна.

Адным з важных сацыяльна накіраваных пытанняў сёння з’яўляецца павышэнне фінансавай дасведчанасці насельніцтва, падкрэсліла Надзея Ермакова. «У Нацыянальным банку цяпер прапрацоўваецца пытанне аб стварэнні кол-цэнтра для кансультавання грамадзян», — адзначыла яна. Пры Асацыяцыі беларускіх банкаў мэтазгодна стварыць адпаведную службу для разгляду спрэчных пытанняў паміж банкамі і кліентамі, павышэння фінансавай дасведчанасці грамадзян і ўмацавання даверу да нацыянальнай банкаўскай сістэмы, лічыць кіраўнік Нацбанка.

Хочаш падзяліцца важнай інфармацыяй ананімна і канфідэнцыйна?