Znaki prypynku
Tut niepadaloku ŭ bok Ramsinniemi (u Chelsynki, Finlandyja) hatelčyk jość nievialički, my sa Stasiem (unukam) praź lasok tudy na mora chodzim. Ad hatelčyka spuskajeśsia na pirs daščany, ź jakoha daŭ nyrca — i papłyŭ… Zručniej, čym iści da hłybini pa kamianiach ad bierahu.
Za ŭsio leta (a takoha soniečnaha i ciopłaha, navat śpiakotnaha leta nie było ŭ ich, kažuć finy, ci sto hadoŭ, ci nikoli) nichto nas ni razu nie spyniŭ, nie pieraniaŭ, a hetym razam pierajmaje žančynka i tłumačyć, što chadzić nam siudy nielha, bo heta pryvatnyja ŭładańni. Nu, ja prabačyŭsia, skazaŭ, što ličyŭ, pakolki hatel… a kali nie — dyk nie.
Idziom dachaty, darohaj tłumaču Stasiu, što chadzić siudy bolej nia budziem, bo tut usio pryvatnaje. Špunt mały spyniajecca, niedaŭmienna azirajecca nazad i pytaje:
— I mora?..
Toje samaje i mnie, prabačajučysia, karcieła spytać u žančynki. Tolki nie jak čatyrochhadovamu dziciaci, a jak savieckamu čałavieku.
* * *
Savieckaja śviadomaść (chaj sabie nielha, ale kali chočacca, dyk možna) najbolš razdražniajecca drabiazoj.
Tut u druhi bok praz druhi lasok jość i pirs, i plaž, i mora — dla ŭsich. Na bierazie altanka, u jakoj možna kiłbaski ci miasa padsmažyć, a kala jaje kafe maleńkaje. Sa znajomym, jaki ź Picieru pryjechaŭ, uziali piva i kiłbaski ŭ kramie — siadzim, pjom, smažym… Piva skončyłasia, dakupili ŭ kafe, pajšli ŭ altanku. Biažyć z kafe haspadynia: «Nielha!..» Što nielha?.. Akazvajecca, piva, kuplenaje ŭ kafe, možna pić tolki ŭ kafe ci za stolikami pobač. A ŭ altancy pjuć tolki pryniesienaje z saboj…
«Čamu tak?..»
Jana i sama nia viedaje, čamu tak, ale i vyśviatlać z nami nie źbirajecca, čamu… Nielha — i ŭsio.
Dla nas heta idyjatyzm, i my pačynajem davodzić joj, što heta idyjatyzm, šukajem spačuvańnia naŭkoł, ale nam nie spačuvajuć. «Nielha — i ŭsio». Dva finy, ź jakimi amal pa-siabroŭsku my tolki što razmaŭlali, adsoŭvajucca i pazirajuć kaluča.
Najlepiej, nie spračajučysia, pierajści ź pivam pad parason kala kafe, tam nia horš. Dyk nie: my vylivajem piva na travu za altankaj…
Na pratest naš nichto i nijak nie reahuje. Vylili dyk vylili, heta možna.
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie10
Kamientary