Ja nie bajusia

Vybuchi ŭ Londanie vyklikali chvalu kibersalidarnaści.

«Ja bajusia vady, ciemry i Robi Ŭiljamza, ale ja nie bajusia terarystaŭ», — napisana na zdymku, zroblenym 14-hadovym Mećju. Heta adno z bolš čym tysiačy fota, raźmieščanych na sajcie www.werenotafraid.com, — tak cyvilizavany śviet adkazvaje na napad terarystaŭ na Londan.

7 lipienia, praz hadzinu paśla taho, jak uvieś śviet zdryhanuŭsia ad źviestak pra londanskija vybuchi, 29-hadovy kamputarščyk Alfi Denen zrabiŭ sajt u Internecie, na jakim raźmiaściŭ svajo fota. U rukach Alfi trymaŭ samarobnuju šyldu sa słovami «Ja nie bajusia». Jon zaklikaŭ inšych internet-karystalnikaŭ dasyłać jamu takija samyja zdymki. «Pakažycie śvietu, što my nie baimsia taho, što zdaryłasia ŭ Londanie, i što śviet budzie lepšym miescam, kali ŭ im nia budzie strachu». Ciapier kolkaść fatazdymkaŭ pieravaliła za tysiaču i imkliva raście, a praz napłyŭ naviedvalnikaŭ sajt niaredka niemahčyma adkryć. Z dnia stvareńnia hetuju staronku prahledzieła ŭžo bolš za čatyry miljony čałaviek.

Fota prychodziać nia tolki z Brytanii, ale i z-za miažy, najčaściej z zachodnieeŭrapiejskich krain dy z Ameryki. Jość zdymki navat ź Blizkaha Ŭschodu. Kali prahladaješ halereju dasłanych fota, pierad vačyma składvajecca piarestaja mazaika. Siarod fatazdymkaŭ niašmat šedeŭraŭ, ale ŭsie jany — ščyryja. Žančyna ź niamieckaha horadu Bremerhafen dasłała zdymak siabie razam sa svajoj kotkaj: «Ja nie bajusia, i maja kotka taksama». Mnohija dasyłajuć fota siabie z prajaznymi biletami na londanskuju padziemku ŭ rukach. Inšyja padychodziać tvorča — naprykład, niechta azdobiŭ zdymak Jody z «Zorkavych vojnaŭ» słovami «Nie bajusia ja».

Denen havoryć, što ad samoha čaćviarha amal nia śpić, bo nie chapaje času na toje, kab vykładać fatazdymki na server. «Ja i nia dumaŭ pra toje, jaki niejmavierny rozhałas vykliča maja ideja», — kaža jon. Papularnaść sajtu pakrysie pačynaje prynosić materyjalny plon — praź jaho ŭžo pradajuć sumki dy futbołki z nadpisam «My nie baimsia». Asnoŭnaja častka hrošaj idzie ŭ fond Čyrvonaha kryžu dla dapamohi paciarpiełym, a rešta — na techničnuju padtrymku sajtu (absłuhoŭvańnie takoj kolkaści naviednikaŭ kaštuje niatanna). Sabie aŭtary nie biaruć ničoha. «My nie źbirajemsia razžyvacca na niaščaści inšych», — piša Denen i jaho kamanda.

Rezkaje źnižeńnie złačynnaści ŭ Ńju-Jorku ŭ pieršyja dni paśla ataki na Ameryku, miljonny marš u Madrydzie paśla vybuchaŭ u ciahnikach, brytanski internet-sajt — usio heta śviedčyć pra zdolnaść zdarovaha hramadztva zhurtavacca i samaarhanizavacca pierad tvaram niebiaśpieki. Navat im, žycharam demakratyj ź viekavoj tradycyjaj, časam treba nahadać sabie: «My razam, i nas bahata».

• 0
• 0
• 0
• 0
• 0
• 0
• 0
• 0