52‑hadovy Arkadź z Hłuska fiktyŭna pastupiŭ va ŭniviersitet u Smalensku. Zastaŭsia biez dypłoma, ale z kryminałkaj

U Rasii 52‑hadovaha hramadzianina Biełarusi Arkadzia Akuliča pryznali vinavatym u dačy chabaru. Žycharu Hłuska prysudzili štraf pamieram prykładna $2600.

Letam 2021 hoda da Akuliča źviarnuŭsia jaho daŭni znajomy — na toj momant prarektar Smalenskaj dziaržaŭnaj sielskahaspadarčaj akademii pa navukovaj rabocie i vytvorčaści. Mužčyny paznajomilisia hadoŭ za dziesiać da taho, kali znajomy pracavaŭ technołaham pa vytvorčaści piva ŭ kampanii «Bachus», i časam stelefanoŭvalisia, u tym liku kab abmierkavać vareńnie piva ŭ chatnich umovach.

Prarektar prapanavaŭ Akuliču pastupić na śpiecyjalnaść «Technałohija vytvorčaści i pierapracoŭki sielskahaspadarčaj pradukcyi». Vyšejšaj adukacyi ŭ biełarusa nie było — tolki siaredniaja śpiecyjalnaja. «Adukacyja lišniaj nie byvaje», — pieradaŭ słovy svajho znajomaha Akulič na dopycie. Chadzić na zaniatki, zdavać ekzamieny i płacić za navučańnie, pavodle prarektara, było nie treba.

Akulič zrabiŭ čatyry fotazdymki 3×4, uziaŭ dypłom i pryjechaŭ u korpus akademii, dzie addaŭ dakumienty supracoŭnicy, da jakoj jaho nakiravaŭ prarektar. Taja była dacentkaj i namieśnicaj adkaznaha sakratara pryjomnaj kamisii. Umovy jana nazvała adrazu: usie naličanyja stypiendyi i vypłaty student addaje joj.

Ustupnyja vyprabavańni Akuliču zabiaśpiečyli — 17 žniŭnia 2021 hoda zahadam rektara jaho zaličyli na pieršy kurs dzionnaj formy za košt fiederalnaha biudžetu. Jon aformiŭ kartku rasijskaha «Śbierbanka» i pieradaŭ jaje razam ź pin-kodam supracoŭnicy akademii. Kali ŭ 2022‑m taja kartku zhubiła, Akulič pa jaje prośbie pieravypuściŭ novuju i addaŭ znoŭ. Dvojčy jon pa vykliku pryjazdžaŭ u akademiju i pisaŭ zajavy na materyjalnuju dapamohu.

Za paŭtara hoda akademija naličyła jamu kala $1060 — heta razam stypiendyja i materyjalnaja dapamoha. Usie hetyja hrošy sud paličyŭ chabaram. Na zaniatkach, zalikach i ekzamienach Akulič nie byŭ nivodnaha razu — stanoŭčyja adznaki ŭ viedamaści vystaŭlała jamu taja samaja supracoŭnica.

Na dopycie jana rastłumačyła, navošta akademii patrebnyja byli takija studenty. Va ŭstanovie zastavalisia niezapatrabavanymi biudžetnyja miescy na «Ahranomii», «Sadoŭnictvie», «Zaatechnii» i «Technałohii vytvorčaści i pierapracoŭki sielhaspradukcyi», a kantrolnyja ličby pryjomu treba było zakryć na 100%. Z 2018 hoda na hetyja napramki štohod zaličvali fiktyŭnych studentaŭ. Adzinaje, što jany musili zrabić sami, — pryjści na dziaržaŭny ekzamien i abaronu dypłoma.

Z pratakołaŭ prasłuchoŭvańnia telefonnych pieramovaŭ vynikaje, što ŭ červieni 2021 hoda Akulič udakładniaŭ u supracoŭnicy, jak by arhanizavać fiktyŭnaje pastupleńnie jašče i jaho synu, ale niešta nie skłałasia.

• 0
• 0
• 0
• 0
• 0
• 0
• 0
• 0