Dźmitryj Šepieleŭ źmianiŭ žyćcio — choča vučyć inšych na dośviedzie svaich skandałaŭ

U červieni 2026‑ha Dźmitryj Šepieleŭ pryznaŭsia padpisčykam u sacsietkach, što rychtuje novy prajekt. I heta nie šou-biznes, a niešta zusim novaje.

Reč u tym, što za apošnija hady Dźmitryj prajšoŭ praź vielizarnyja publičnyja skandały. U 2015‑m ad raku pamierła jaho žonka, śpiavačka Žanna Fryskie. Jašče da jaje śmierci Šepieleŭ rassvaryŭsia ź jaje baćkami i pazbaviŭ ich mahčymaści kamunikavać z unukam. Potym byli sudy za nieruchomaść i prablemy z hrašyma, sabranymi na lačeńnie Žanny, šumnaje zvalnieńnie z rasijskaha «Pieršaha kanała», skandał sa zdymkami ŭ Maryupali i svarka ź viadučaj Leraj Kudraŭcavaj.

Ciapier Šepieleŭ hatovy dzialicca dośviedam, jak siabie pavodzić u čas skandałaŭ. U červieni jon pisaŭ:

«Ja viedaju, što heta takoje, kali la ŭvachodnych dźviarej u kvateru čakajuć kamiery. Što takoje — kazać pra samaje patajemnaje na šmatmiljonnuju aŭdytoryju, jak utrymlivać asabistyja miežy, kali ich žadajuć rastrybušyć, jak trymać udar i zachoŭvać honar. Heta byŭ ekstremalny i niepaŭtorny dośvied.

I mušu pryznać — na hetym šlachu ja narabiŭ bahata pamyłak. Ja maŭčaŭ, kali treba było kazać, byŭ žorstki, kali treba było tłumačyć, zastavaŭsia ŭ cieniu, kali treba było zrabić krok napierad i abaraniacca».

Šepieleŭ atrymaŭ dadatkovuju adukacyju ŭ śfiery kryzisnych kamunikacyj i ciapier choča vučyć publičnych ludziej, jak davać rady takim kryzisam. Svoj prajekt, AXIS, jon robić z Volhaj Piaskovaj. Heta daśviedčanaja pijarščyca, jakaja pracuje z kryzisnymi kamunikacyjami bolš za 25 hadoŭ, jana ŭdzielničała ŭ sotniach antykryzisnych kampanij, u tym liku i z rasijskimi dziaržorhanami.

Na sajcie prajekta jość śpis prahram, pavodle jakich Šepieleŭ i Piaskova hatovyja dapamahčy. Kali kryzis jašče nie nadyšoŭ, jany prapanujuć vyśvietlić słabyja miescy ŭ vobrazie čałavieka ci kampanii, a taksama natreniravać pavodziny na vypadak skandałaŭ. Dapamohuć i ŭ čas samich kryzisaŭ, i paśla ich. Ceny na pracu ekśpiertaŭ zakrytyja — ich mahčyma daviedacca tolki paśla padačy zajaŭki.

Novaja praca adbiłasia na tym, što Šepieleŭ piša ŭ sacsietkach. Jašče ź viasny jon publikuje ŭ svaim telehram-kanale razbor publičnych skandałaŭ i taho, jak u ideale varta było b na ich reahavać.

Naprykład, jon parazvažaŭ pra skandał z rasijskaj kramaj adzieńnia OldBaby Shop, u jakoj zvolnili supracoŭnicu za toje, što jana nie vyjšła na pracu paśla śmierci dziaduli. Na dumku Šepieleva, kali pracuješ ź ludźmi i ŭ biznesie, važna ŭmieć spačuvać, tamu pieršaje paviedamleńnie supracoŭniku ŭ hory musić być sa spačuvańniami.

Adznačyŭ Dźmitryj i toje, što taja supracoŭnica apublikavała pierapisku z kiraŭnictvam:

«Toje, što čytaje adzin, mohuć pračytać usie. Tamu stroha filtravać pracoŭnuju pierapisku — heta minimalnaja hihijena. Sprečki vyrašajucca nie ŭ pracoŭnym čacie i nie ŭ ryłz, a pry asabistaj sustrečy».

Jašče adzin post Dźmitryj pryśviaciŭ skandalnamu filmu «Apošni vołat. Kałabok». Adna z historyj vakoł hetaha prajekta — toje, jak režysior i vykanaŭca hałoŭnaj roli pasvarylisia ŭ sacsietkach z maskoŭskim elektrykam, jakomu nie spadabałasia hrafika ŭ filmie.

Šepieleŭ nahadvaje, što na kamientary publičnych asobaŭ źviernuć uvahu. Tamu kali ty viadomy, treba trymać siabie ŭ rukach:

«Narodnyja hieroi musiać paźbiahać svarak. Trymać dystancyju — heta nie fanaberystaść, heta abarona, i jašče honar.

U hetym mahija znakamitaściaŭ. Usie, chto pačaŭ zarablać, iduć u aeraporcie praź vip. Heta nie raskoša, a košt kamfortu dla siabie i, što važna, dla navakolnych».

Apošni čas Dźmitryj taksama šmat zajmajecca vykładańniem. Naprykład, u rasijskaj «Vyšejšaj škole ekanomiki» ciapier dastupny kurs «Majsternia tok-šou», i pavodle sajta navučalnaj ustanovy, zaniatki ładziać jakraz pry ŭdziele Šepieleva.

Byvaje ŭ jaho i vyjaznaja praca. U listapadzie 2025‑ha Šepieleŭ pajechaŭ u Abchaziju, kab dać tam žurnaliscki majstar-kłas. A zaadno daŭ kamientar tamtejšym žurnalistam, dzie raschvalvaŭ Abchaziju — maŭlaŭ, ź dziciačaha ŭzrostu zachoŭvaje ŭspaminy pra adpačynak tam z baćkami.

• 0
• 0
• 0
• 4
• 0
• 0
• 1
• 0