Mienski «Oŭpen». Paślasłoŭje

Toje, pra što tak doŭha kazali, ździejśniłasia: u Miensku dla ŭsich amataraŭ hulni adbyŭsia niebłahi turnir.

U «švajcarku» zapisalisia ŭ pieršuju čarhu šachmatysty ź mižnarodnym rejtynham, dla jakich byli admysłova źnižany ŭnioski. Hulaŭ uvieś biełaruski šachmatny bamond, akramia «hrosaŭ» Fiodarava i Kavalova, čempijonki krainy Šarevič. Z-za kardonu nie prybyli najmacniejšyja: ad rasiejcaŭ dy ŭkraincaŭ vystupaŭ druhi i treci ešalon. Kidałasia ŭ vočy adsutnaść palakaŭ, čechaŭ, niemcaŭ, anhłasaksaŭ dy francuzaŭ.

Arhanizatary sa skruchaj dzialilisia ŭ kuluarach: «Kab možna było zabiaśpiečyć startavyja hanarary, da nas i Anand z Tapałavym zavitali b. Ale turnir i tak ulacieŭ u kapieječku sponsaru: było vydatkavana bolš jak 20 młn rubloŭ».

Ale była viasiołaja abstanoŭka turniru, što nahadvała karnavał: poruč tusavalisia hulcy, trenery, sudździ, pradaŭcy knižak, žurnalisty, zaŭziatary. U strakatym natoŭpie zaviazvalisia dyjalohi na takija miłyja temy, jak admietnaść słavianskaj cyvilizacyi, «zasille rasiejcaŭ» u biełaruskich šachmatach… Pieramožca paŭfinału pieršynstva stalicy Valer Hardziajenia ŭsłych razvažaŭ, ci varta jechać na tradycyjny načny blicturnir u Viciebsku (18—19 lipienia), i davodziŭ karespandentu «NN», što, «majučy sorak dva hady, unačy lepiej spać». Armianskaja majstarka Elina Danielan, šykoŭnaja blandynka, jakaja ledź nie pieramahła rejtynh-favaryta Alaksandrava i ŭrešcie zavajavała žanočy pryz, zachaplałasia adramantavanym Pałacam šachmat i šašak.

Ale nia ŭsim hulcam było adnolkava kamfortna pierasoŭvać fihury. U adnoj zali, dzie ščyravali lidery turniru, dychałasia lohka, u druhoj stajała zaducha. Ventylatary nie davali rady: kali vieryć abiacańniu namieśnicy ministra sportu Haliny Zaburjanavaj, nadalej kruciołki buduć zamienieny na kandycyjanery. Dobra papracavaŭ hałoŭny sakratar turniru Vasil Jakušaŭ, dešyfrujučy kramzoli ź firmovych blankaŭ dla zapisu partyj, — jamu daviałosia pieravieści ŭ elektronny vyhlad niekalki socień tekstaŭ. Tym nia mienš, mieła sens bolš aperatyŭna vykładvać partyi turniru ŭ siecivie — na analahičnych spabornictvach za miažoj heta robicca na praciahu 24 hadzin.

Udzielniki paraźjechalisia 18 lipienia — chto z hrašyma, chto z zapisami pamiatnych batalij, chto z dobrym nastrojem. Na zakryćci nastroj šachmatystam uzdymali hurt staražytnaj muzyki «Pastaral», šoŭ-balet Valerja Burava i telekamentatar Uładzimier Navicki.

Pieršaje miesca u Alaksieja Alaksandrava, druhoje — u maładoha rasiejskaha hrosmajstra Alaksandra Razancava, treciaje — u Siarhieja Azarava.

• 0
• 0
• 0
• 0
• 0
• 0
• 0
• 0