Alaksandar Łukašenka paprasiŭ pieranieści adkryćcio Nacyjanalnaj biblijateki bližej da prezydenckich vybaraŭ.
A jašče — kab u tym budynku praduhledzieli jahony «prezydent-centar» dla sustreč na najvyšejšym uzroŭni.
Raniej viałosia, što funkcyjanavać naviutkaja Nacyjanalnaja biblijateka budzie ź 1 studzienia, ale ciapier prezydent skazaŭ, što śpiašacca nia treba. «Hałoŭnaje, kab usio było dobra zroblena».
U biblijatecy sapraŭdy budzie ŭsio — navat biznes-centar z kramami, halerejami, kanferenc-zalami, restaracyjami, parkinhami, saŭnaj j trenažorami. Zhodna z novym štatnym raskładam, u Nacyjanalnaj biblijatecy budzie pracavać sama mieniej tysiača čałaviek.
Vakoł planujecca raźbić vielizarny superpark, što moža prymać adnačasova piać tysiač čałaviek. Budzie tut i «Mini-Biełaruś» z makietami haradoŭ i viosak, i «Mazaika śvietu» ź cieramami-krendzielami, siaredniaviečnymi zamkami dy azijackimi sadami. Źmieściacca tut i kancertny amfiteatar, i bulvary, i, vidać, trasy dla łyžnikaŭ.
Šoŭ z adkryćciom biblijateki piarojmie estafetu śviatkavańniaŭ dvuch šaścidziesiacihodździaŭ skančeńnia vajny. Vyklučnaja padzieja ahulnanacyjanalnaha maštabu napiaredadni prezydenckich vybaraŭ. Chto sumniajecca ŭ tym, što čyrvonuju stužačku pierareža mienavita Łukašenka? 1 studzienia — heta zarana, a voś pad samyja vybary — toje što treba. Rychtyk jak rymskija imperatary śpiašalisia budavać usio novyja, svaje forumy.
Novy šklany šmathrańnik biblijateki z parkami, memaryjałami słavutych biełaruskich dziejačaŭ z šaścimetrovym Skarynam na čale stanie novym centram novaje stalicy Biełarusi.
Hrošy na novuju biblijateku, budaŭnictva jakoj niby zaviaršajecca, źbiralisia pa ŭsim śviecie. Navat Sadam Chusejn adškadavaŭ pačak dalaraŭ. A «dobraachvotnyja achviaravańni» skłali dastatkova značnuju sumu — 4,5 miljardy biełaruskich rubloŭ, bolš za 500 tysiač dalaraŭ i kala 50 tysiač eŭra. Niamała, jak dla našaj krainy.
«Jakaja kraina, takaja j biblijateka», — skazaŭ u adnym ź interviju hieneralny dyrektar Rasiejskaj dziaržaŭnaj biblijateki Viktar Fiodaraŭ. Spračacca nie vypadaje. Pahatoŭ kali viedać, što ŭ toj samaj rasiejskaj biblijatecy — 400 tysiač novych pastupleńniaŭ na hod. To bok za jakich 20 hadoŭ možna sabrać knih stolki ž, kolki ŭ kolišniaj mienskaj «Lenincy». A voś da prezydenckich apartamentaŭ u hałoŭnaj biblijatecy krainy nie daŭmielisia navat u Maskvie.
Pakul uračystaje adkryćcio Nacyjanalnaj biblijateki Biełarusi planujecca 1 vieraśnia 2006 hodu. A dvaccać dźvie biblijatečnyja zali, u jakich zmohuć pracavać adnačasova dźvie tysiačy čytačoŭ, adčyniacca 1 studzienia 2007 hodu. Čakajecca, što budzie zabiaśpiečany j kamputarny dostup karystalnikaŭ da fondaŭ biblijateki, dziela čaho padpisana damova z Kitajem na pastaŭku abstalavańnia na sumu 1 młn dalaraŭ.
Stary budynak biblijateki, jaki byŭ zadumany 75 hadoŭ tamu, jakim hetak hanaryŭsia Miensk, dzie vyhadavalisia pakaleńni našych intelihientaŭ, čakaje novych haspadaroŭ.
Kamientary