Za kalijnymi ŭhnajeńniami padychodzić čarha naftapraduktaŭ. U vypadku kaliju pad vyhladam centralizacyi Biełaruś paprostu zamianiła partnera.
Dziaržava prybiraje da ruk usio, adkul možna atrymać hrošy. U pieršuju čarhu, valutanosnyja haliny — kalijnyja ŭhnajeńni dy naftapradukty.
U krainie stvoranaja dziaržaŭnaja manapolija na ekspart kalijnych uhnajeńniaŭ. 29 žniŭnia A.Łukašenka ŭkazam №398 nadaŭ vyklučnaje prava na ekspart pradukcyi «Biełaruśkaliju» stvoranamu ŭ krasaviku AAT «Biełaruskaja kalijnaja kampanija». Ukaz ustupić u siłu 25 vieraśnia.
Pavodle ŭkazu «Biełaruśkalij» budzie ažyćciaŭlać mytnaje afarmleńnie j vyvaz pradukcyi za miežy Biełarusi tolki praz BKK (98% u joj naležyć «Biełaruśkaliju», 2% — AAT «Horadnia Azot»). A ŭžo apošniaja budzie pradavać uhnajeńni. Raniej usimi hetymi pracedurami zajmałasia Mižnarodnaja kalijnaja kampanija.
Dahetul «Biełaruśkalij» pradavaŭ uhnajeńni (a heta bolš za 13% ich suśvietnaj vytvorčaści) na ekspart vyklučna cieraz zbytavuju sietku MKK. Aficyjnaja pryčyna admovy ad raniejšaj schiemy prodažu samaha prybytkovaha z praduktaŭ biełaruskaj vytvorčaści — centralizacyja ekspartu ŭhnajeńniaŭ. Nasamreč Biełaruś paprostu zamianiła partnera.
Pazbycca MKK
Mižnarodnaja kalijnaja kampanija, praz zbytavuju sietku jakoj Biełaruś z 1992 h. ažyćciaŭlała prodaž kalijnych uhnajeńniaŭ, tolki naminalna składałasia ź «Biełaruśkaliju» dy rasiejskich «Silvinit» i «Ŭrałkalij». Apošnija niekalki hadoŭ samastojna pradaje pradukcyju. I jahony hiendyrektar Dźmitry Rybałaŭloŭ niekalki razoŭ pryjaždžaŭ u Biełaruś, sustrakaŭsia z A.Łukašenkam. Vynikam sustrečaŭ stała niadaŭniaja zajava pra dałučeńnie «Ŭrałkaliju» da Biełaruskaj kalijnaj kampanii — dziela supolnaj realizacyi pradukcyi na ekspart. Pry takim raskładzie pa-za hulnioj apynułasia salikamskaje AAT «Silvinit», jakoje praź niejki čas taksama abvieściła, što viadzie kansultacyi, jak dałučycca da BKK.
Svaim ukazam prezydent vyzvaliŭ BKK adrazu ad abaviazkovaha prodažu valuty ad hiešeftaŭ i ad afšornaha zboru pa damovach marskich pieravozak i dastavak pradukcyi da mora (15% ad ahulnaj sumy ŭhody).
Vyhladaje, što dziaržava kančatkova vykreślivaje ź planaŭ supracu ź Mižnarodnaj kalijnaj kampanijaj, a da kanca hodu MKK naahuł zastaniecca bieź siabroŭ, što pryviadzie da jaje źniknieńnia. Biełaruś ža całkam pierachopić inicyjatyvu pa eksparcie bolš za 40 % suśvietnaha rynku kalijnych uhnajeńniaŭ.
Zvanočak naftatrejderam
Toje samaje adbyvajecca na rynku naftapraduktaŭ. Urad padrychtavaŭ dakumenty pa stvareńni adzinaha ZAT «Biełaruskaja naftavaja kampanija» pa eksparcie naftapraduktaŭ. Jaje zasnavalnikami buduć dziaržaŭnaje pradpryjemstva «Biełarusnafta», manapalist naftazdabyčy ŭ krainie, Biełaruski naftavy handlovy dom — adna z daččynnych strukturaŭ dziaržkancernu «Biełnaftachim», a taksama zavody «Naftan» (Navapołacak) i MNPZ (Mazyr). Dola kožnaha z čatyroch zasnavalnikaŭ budzie 25%.
Iznoŭ ža stvareńnie adzinaha aperatara pa eksparcie naftapraduktaŭ stavić za metu centralizavać ekspart adnoj z samych prybytkovych halinaŭ. Ciapier naftapradukty, jakija vypuskajuć biełaruskija naftapierapracoŭčyja zavody, pradajuć blizu 10 kampanijaŭ: «Jukoła», «Słaŭnafta-Start», «Trajpł», «Miraleks», «Junivest-M», a taksama «dočki» «Itery» i «Łukojłu». Da kanca hodu va ŭsich hetych strukturach mohuć uźniknuć tyja ci inšyja prablemy.
Dziaržava planuje ad pačatku centralizavać zakupku nafty dy jaje ekspart, a potym — dadać siudy jašče j pastaŭščykoŭ nafty na biełaruskija NPZ. Biełaruś zdabyvaje svajoj nafty mieniej za 2 młn ton na hod, a našyja zavody štohod ahulna pierapracoŭvajuć amal u 10 razoŭ bolej (absalutnaja bolšaść — rasiejskaja). I tolki za pieršaje paŭhodździe Biełaruś ekspartavała amal 7 młn ton naftapraduktaŭ.
Zaplanavanyja pieramieny nastolki maštabnyja, što, mahčyma, paŭpłyvajuć na chod nastupnaj vybarčaj kampanii.
Kamientary