Sud vynies papiaredžańnie niepaŭnahadovaj dziaŭčyncy

Sud Centralnaha rajonu Miensku razhledzieŭ spravu niepaŭnahadovaj školnicy Vieraniki Łazoŭskaj i vynies joj papiaredžańnie. Dziaŭčynku abvinavacili za niepadparadkavańnie supracoŭnikam milicyi. Jaje zatrymali na pikiecie kala Rasiejskaj ambasady 28 sakavika, ale sudzili za padziei 6 sakavika, kali ŭ jaje znajšli ahitacyjnyja materyjały za kandydata na prezydenta Alaksandra Milinkieviča.

Sudździa Alaksiej Byčko nie dazvoliŭ paplečnikam Vieraniki Łazoŭskaj, siabram moładzievaj niezarehistravanaj arhanizacyi «Zubar», prysutničać na sudovym pasiedžańni. Supracoŭniki milicyi abvinavacili dziaŭčynku za niepadparadkavańnie patrabavańniam milicyjanta. Vieranika raspaviała ŭ sudzie, što 6 sakavika milicyjanty zatrymali jejnuju siabroŭku j advieźli ŭ milicyju Centralnaha rajonu.

Praź niejki čas Vieranika pryjšła tudy j pacikaviłasia, kali adpuściać siabroŭku. Tady, ź jejnych słoŭ, major milicyi ŭdaryŭ Vieraniku j zaciahnuŭ u pastarunak. Dziaŭčynku abšukali – i znajšli ŭ jaje dazvolenyja ahitacyjnyja ŭlotki z partretam kandydata na prezydenta Alaksandra Milinkieviča. Ahitacyjnyja materyjały zabrali, a dziaŭčynku, razam ź siabroŭkaj, adpuścili.

Havoryć Vieranika:

(Łazoŭskaja: ) «Mianie ŭdaryli. Heta byŭ major Šarahuraŭ. Taki, z vusami. Spačatku na mianie chacieli skłaści pratakoł, što ja, nibyta, niecenzurna łajałasia na hetaha majora. Potym – što ja rasklejvała nalepki. Potym mianie pałochali, što zaviaduć kryminalnuju spravu za zaklik pryjści na niesankcyjanavanuju akcyju 19 sakavika».

Sudździa Alaksiej Byčko vynies dziaŭčyncy papiaredžańnie.

Baćka Vieraniki Viktar Ptašnik aburany dziejańniami ŭładaŭ:

(Ptašnik: ) «Hety fakt mianie aburaje z dvuch bakoŭ. Z adnaho boku, ja aburany pavodzinami majoj dački, jakaja musić pierš za ŭsio vučycca, a tolki potym zajmacca palitykaj. Z druhoha boku, mianie aburaje ŭłada, jakaja z pustoha razdźmuchvaje palityčnuju spravu. Jana tym samym padahravaje sytuacyju ŭ krainie j pamnažaje kolkaść apazycyjaneraŭ. Školnicu paciahnuli ŭ sud… Milicyjant kazaŭ: «Ja hetych apazycyjaneraŭ viedaju. Ź imi – lepš pa zakonie».

U toj ža dzień, kali zatrymali aktyvistaŭ niezarehistravanaha ruchu «Zubr» za niesankcyjanavany pikiet la Rasiejskaj ambasady, siabry adzinaj zarehistravanaj moładzievaj arhanizacyi BRSM praviali šerah pikietaŭ la ambasadaŭ krainaŭ Eŭraźviazu. Siarod inšych jany trymali plakaty: «Dałoŭ dvajnyja standarty!». Pavodle zakanadaŭstva, zajaŭku na praviadzieńnie masavaha mierapryjemstva treba padavać u vykankam nie paźniej jak za 15 dzion da času pikietavańnia. Staršynia idealahičnaha Ŭpraŭleńnia Mienharvykankamu Hienadź Kurbieka paviedamiŭ, što pikiety sankcyjanavany ŭładami.

(Kurbieka: ) «A hetyja dziacišački padavali zajavačku ŭ harvykankamčyk? Nu, dyk voś. Takoje prava – dazvalać ci nie dazvalać – delehavana vykankamu, staršyni, albo namieśniku staršyni».

Siabry niezarehistravanych moładzievych arhanizacyj paviedamili «Svabodzie», što padavać zajaŭki ŭ Mienharvykankam na praviadzieńnie apazycyjnych akcyj ličać biessensoŭnym. Ciaham apošnich hadoŭ amal usie takija zajaŭki haradzkija ŭłady adchilali.

Radyjo Svaboda

• 0
• 0
• 0
• 0
• 0
• 0
• 0
• 0