Z dakłada Paleckisa: Situacyja z pravami čałavieka ŭ Biełarusi vyklikaje aściarohi

Situacyja z pravami čałavieka ŭ Biełarusi «zastajecca sumnaj i vyklikaje aściarohi». Pra heta havorycca ŭ spravazdačy, jakuju dakładčyk delehacyi Jeŭraparłamienta (JEP) pa Biełarusi Justas Paleckis padrychtavaŭ dla Savieta ES, Jeŭrakamisii i Słužby źniešnich dziejańniaŭ.

9 lipienia kamitet pa zamiežnych spravach JEP uchvaliŭ dakład u druhim čytańni paśla taho, jak u dakumient było ŭniesiena kala 300 papravak. Siońnia tekst uchvalenaha dakumienta apublikavany na sajcie Jeŭraparłamienta.

Nahadajem, pradstaŭleńnie kamitetu dakłada pa Biełarusi ŭ pieršym čytańni ŭ kancy maja vyklikała vialiki hramadski rezanans.

U vynikovym varyjancie dakłada havorycca: «Niahledziačy na źmianšeńnie ŭ absalutnych ličbach palityčna matyvavanych aryštaŭ (pavodle danych pravaabarončaha centra „Viasna“ z 868 u 2011 hodzie da 235 u 2012 hodzie), zachoŭvajecca atmaśfiera represij i zapałochvańnia».

U dakumiencie taksama zaznačajecca, što majučy adbycca ŭ listapadzie ŭ Vilni samit Uschodniaha partniorstva «moža stać važnaj mahčymaściu dla palapšeńnia adnosin pamiž Biełaruśsiu i ES pry ŭmovie, što biełaruskija ŭłady vyzvalać i reabilitujuć usich palitviaźniaŭ,

U svaju čarhu apazicyi, jak zaznačajecca ŭ dakładzie, nieabchodna pracavać nad stvareńniem ahulnaj stratehii i płana dziejańniaŭ. Stvareńniu takoj stratehii sadziejničali b kankretnyja miery — takija, naprykład, jak ahulny śpis kandydataŭ u deputaty na miascovych vybarach 2014 hoda, ahulnaja palityčnaja prahrama, vyłučeńnie adzinaha kandydata na prezidenckich vybarach 2015 hoda.

Jeŭrakamisii, Viarchoŭnamu pradstaŭniku ES pa źniešniaj palitycy i palitycy biaśpieki, Savietu ES i dziaržavam — členam ES jeŭraparłamientaryi rekamiendujuć zaklikać biełaruskija ŭłady pavažać pravy čałavieka i ruchacca ŭ kirunku demakratyčnych reform, kab spynić samaizalacyju krainy ad Jeŭropy.

ES taksama pavinien jašče raz jasna akreślić: pieradumovaj jakoha-niebudzć prahresu, jaki moh by pryvieści da źniaćcia sankcyj i razbłakiroŭki dvuchbakovych adnosin, źjaŭlajecca biezumoŭnaje i nieadkładnaje vyzvaleńnie i reabilitacyja ŭsich palitźniavolenych, padkreślivajecca ŭ dakładzie.

Jeŭraparłamient taksama miarkuje, što Rasiju i krainy Uschodniaha partniorstva varta zapeŭnić zaklikać Biełaruś nieadkładna vyzvalić palitźniavolenych.

ES, havorycca ŭ dakładzie, pavinien „z najbolšaj karyściu vykarystać časovaje prypynieńnie vizavych sankcyj u dačynieńni da ministra zamiežnych spraŭ Biełarusi jak dypłamatyčnaha kanała suviazi,

Pry hetym u dačynieńni da inšych čynoŭnikaŭ, „adkaznych za parušeńni demakratyčnych vybarčych standartaŭ i pravoŭ čałavieka“, sankcyi admianiacca nie pavinny», miarkujuć u Jeŭraparłamiencie.

ES taksama pavinien «zaachvočvać dyjałoh z tymi čynoŭnikami, jakija nie byli piersanalna ŭciahnutyja ŭ represii, dla taho, kab sadziejničać raźvićciu biełaruska-jeŭrapiejskaha supracoŭnictva, a taksama ich uzajemadziejańniu ź biełaruskaj hramadzianskaj supolnaściu, kab u vyniku ablehčyć praviadzieńnie reform».

U spravazdačy havorycca i pra toje, što Biełaruś pavinna vykanać usie rekamiendacyi Biuro pa demakratyčnych instytutach i pravach čałavieka ABSIE, źniać lubyja abmiežavańni na ažyćciaŭleńnie prava na svabodu schodaŭ, vykazvańniaŭ, mirnych schodaŭ, słova dla pradstaŭnikoŭ apazicyi, hramadzianskaj supolnaści i niaŭradavych arhanizacyj, u tym liku likvidavać lubyja pieraškody pa rehistracyi NDA.

Aprača taho, zaznačajecca ŭ dakładzie, u Biełarusi nieabchodna pravieści reformy, jakija harantavali b niezaležnaść sudovaj sistemy, nie pryvodzić u vykanańnie vyniesienyja ŭ 2013 hodzie śmiarotnyja pryhavory i ŭvieści maratoryj na śmiarotnuju karu.

ES rekamiendavana ŭ adnabakovym paradku spraścić paradak vydačy viz dla biełarusaŭ i źnizić ich košt z 60 jeŭra da ŭzroŭniu, prymalnaha dla biełaruskich hramadzian, a taksama ŭ poŭnaj miery vykarystać mahčymaści dla vydačy biaspłatnych viz, jakija daje Vizavy kodeks ES.

• 0
• 0
• 0
• 0
• 0
• 0
• 0
• 0