Alaksandr Łukašenka 13 vieraśnia pravioŭ sustreču z prezidentam, staršynioj praŭleńnia Śbierbanka Rasii Hiermanam Hrefam. Ab hetym BiełTA paviedamili ŭ pres-słužbie biełaruskaha kiraŭnika.
Łukašenka prapanavaŭ na sustrečy abmierkavać biahučyja pytańni i prablemy ŭ sumiesnaj pracy. «Choć bank funkcyjanuje, pracuje, niahledziačy na peŭnyja składanaści, jakija ŭ nas adbyvajucca ŭ suviazi z prablemami ŭ suśvietnaj ekanomicy, — adznačyŭ Alaksandr Łukašenka. — Vy jak ekanamist i čałaviek, jaki zajmaŭsia va ŭradzie hetymi prablemami, viedajecie, što takoje realny siektar ekanomiki,
što takoje ekspartaaryjentavanaja ekanomika i jak ciažka pracavać, kali pakupnicki popyt na tavary i pradukcyju padaje».
«My jak raz hetym ciapier zakłapočanyja, i byccam by dynamika ŭ nas užo pajšła ŭ lepšy bok. Prynamsi, u nas niama ni padzieńnia vytvorčaści, ni padzieńnia zbytu, a naadvarot — pa 2–3% my patrochu dadajem pa realizacyi pradukcyi, u tym liku na alternatyŭnych rynkach, nie tolki ŭ Rasii. Tamu spadziajemsia, što da kanca hoda my situacyja vypravicca» , — cytuje Łukašenku BiełTA.
Siońnia rasijskija ŚMI paviedamili, što Sulejman Kierymaŭ pradaje svoj pakiet va «Urałkalii» blizkamu da Uładzimira Pucina pradprymalniku Uładzimiru Kohanu.
Kierymaŭ chacieŭ atrymać za akcyi «Urałkalija» $ 4,5 młrd., ale ciapier havorka idzie pra $ 3,7 młrd. Krynicy śćviardžajuć (pišuć rasijskija ŚMI), što rasijskija ŭłady pastavili Kierymavu krajni termin prodažu aktyvu i biźniesmienu było ŭžo nie da handlu.
ŚMI taksama paviedamlali, što Kohan raniej byŭ hatovy vykupić dolu Kierymava, ale ŭ jaho nie chapała srodkaŭ.
Kazałasia, što pradprymalnik vioŭ pieramovy ab kredycie akurat sa Śbierbankam.
U piatnicu Hierman Href u Minsku na pytańnie žurnalistaŭ, ci budzie jaho bank kredytavać Kohana, zajaviŭ, što nie kamientuje niezavieršanyja ździełki, uskosna paćvierdziŭšy takim čynam, što pieramovy sapraŭdy viaducca.
Taksama siońnia viadomy rasijski advakat Alaksandr Dabravinski paviedamiŭ, što Kierymaŭ pradaŭ dolu va «Urałkalii» ŭ abmien na svabodu hiendyrektara Uładzisłava Baŭmhiertniera, jaki ad 26 žniŭnia znachodzicca ŭ minskim SIZA KDB.
Dabravinski śćviardžaje, što Baŭmhiertnier ciaham dvuch-troch tydniaŭ pavinien vyjści na svabodu.
Ciapier čytajuć
Biełarus zrabiŭ prapanovu kachanaj kala znakamitaha fantana Trevi ŭ Rymie — pad apładysmienty dziasiatkaŭ turystaŭ17
Kamientary