Incydent zdaryŭsia ŭ noč na aŭtorak, miačeć znachodzicca niepadalok ad miesca, dzie u paniadziełak vybuchnuŭ aŭtobus.
U noč na aŭtorak nieviadomyja pasprabavali padpalić miačeć u Vałhahradzie, adnak pažar udałosia svoječasova patušyć.
Pa słovach imama Rustama-Chazrat Jakubava, musulmanie horada zaniepakojenyja incydentam i aścierahajucca za svaju biaśpieku.
Jak raspavioŭ Jakubaŭ u intervju Ruskaj słužbie Bi-bi-si, jon pračnuŭsia kala 3.30 hadzin ranicy pa maskoŭskim časie ad huku raźbitaha škła.
Jaho siamja žyvie ŭ słužbovaj kvatery ŭ miačeci. Spuściŭšysia na pieršy pavierch, jon ubačyŭ, što haryć malitoŭnaja zała. Jak vyśvietliłasia, nieviadomyja kinuli dźvie butelki z zapalnaj sumieśsiu ŭ vokny miačeci.
Adzin z takich kaktejlaŭ Mołatava zahareŭsia, paviedamiŭ imam. Pažar udałosia patušyć padručnymi srodkami jašče da pryjezdu MNS.
Padpalščykaŭ źniali kamiery vonkavaha nazirańnia. Pa słovach Jakubava, ich było dvoje. Zaraz śledčyja orhany pravodziać ekśpiertyzu na miescy padpału.
Miačeć raźmieščana niepadalok ad taho miesca, dzie napiaredadni adbyŭsia vybuch u haradskim aŭtobusie Vałhahrada, jaki zabraŭ žyćci šaści čałaviek. Imam adznačyŭ, što prychadžanie vielmi pieražyvajuć z-za taho, što zdaryłasia i vykazvajuć aściarohi za svaju biaśpieku.
Jon padkreśliŭ, što musulmanie asudžajuć zabojstva niavinnych ludziej.
Pa dadzienych Śledčaha kamiteta Rasii, vybuch zładziła śmiarotnica — uradženka Dahiestana 30-hadovaja Naida Asijałova.
Pavodle papiaredniaj infarmacyi, jana pryjechała ŭ Vałhahrad z Machačkały. Na miescy vybuchu byŭ znojdzieny bilet na aŭtobus «Machačkała-Maskva» na imia Asijałavaj, na jakim žančyna prybyła ŭ Vałhahrad. Taksama byŭ znojdzieny jaje pašpart.
Ciapier čytajuć
Aleksijevič: Adno z samych mocnych uražańniaŭ u žyćci — kali ja apynułasia ŭ natoŭpie ŭ 2020 hodzie14
Kamientary