Sud nad maci Ihara Pcičkina i Andrejem Bandarenkam pieranieśli na 14 listapada
U Maskoŭskim sudzie Miensku sudziać pravaabaroncu Andreja Bandarenku i Žanu Pcičkinu, maci pamierłaha ŭ izalatary na Vaładarskaha Ihara Pcičkina.
Pra heta Svabodzie paviedamiła Iryna Pcičkina, siastra zahinułaha:
«Maci pryvieźli ŭ sud pad prymusam. Jana zapatrabavała advakata, i sud nad joj adkłali da 18:30. Tudy jak śviedka pryjšoŭ Andrej Bandarenka, ale jaho «prabili», što i jon zatrymlivaŭsia, i pačali taksama sudzić. Jon taksama patrabuje advakata».
Pikiet, u jakim brali ŭdzieł Žana Pcičkina i pravaabaronca Andrej Bandarenka, adbyvaŭsia kala SIZA na vulicy Vaładarskaha 14 vieraśnia. Milicyja nie dazvoliła ludziam uskłaści kvietki da muroŭ izalataru ŭ pamiać pra Ihara Pcičkina. Bolš za 10 čałaviek byli zatrymanyja, šaściora ź ich adbyli dzień u izalatary i potym byli asudžanyja na štrafy. Spravy niekatorych inšych zatrymanych byli adkładzienyja.
Miančuk Ihar Pcičkin pamier u izalatary na Vaładarskaha 4 žniŭnia. Svajaki ličać, što małady čałaviek byŭ zabity achoŭnikami. U kastryčniku stała viadoma, što Śledčy kamitet zavieŭ kryminalnuju spravu pavodle hetaha zdareńnia.
18:45 Sudździa Maskoŭskaha sudu Jaŭhien Chatkievič, jaki razhladaje spravu Andreja Bandarenki, pieranios słuchańni na 15:00 14 listapada praz toje, što siońnia advakat Andreja Bandarenki nia moža prysutničać na pracesie. Žana Pcičkina jašče čakaje svajho advakata, jaje sprava pakul nie adkładałasia.
19:20 Sud nad Žanaj Pcičkinaj taksama adkładzieny na 14 listapada. «Ja zapatrabavała taksama vyklikać śviedak z majho boku, i sudździa Jaŭhien Chatkievič z hetym pahadziŭsia», — paviedamiła Žana Pcičkina karespandentu «Svabody». Sud nad maci zahinułaha na Vaładarcy Ihara Pcičkina musić pačacca a 16:30.
Što aznačaje zahadkavy kod R99 u pryčynach śmierci Uładzimira Makieja i Vitolda Ašurka?5
Kamientary