Parady lekara byłym viaźniam

Najbolš typovaja prablema, što napatkała vyzvalenych – parušeńnie snu. Piša lekar Andrej Vituška.

3, 7, 10, 15 sutak źniavoleńnia – vusny sudździaŭ ahučvali terminy prosta i abyjakava. Sarakahadovyja kabiety ŭ mantyjach z adnolkavaj lohkaściu adpraŭlali ŭ pierapoŭnienyja kamery na Akreścina maładzieńkich dziaŭčat i stałaha vieku mužčyn.

«Pravaparušalniki» adbyli pryznačanaje z hodnaściu i vyjšli na svabodu hierojami. Ale ad turemnych ścienaŭ u ich zastalisia nia tolki ŭspaminy. Na žal, mnohija z byłych viaźniaŭ ciapier majuć prablemy sa zdaroŭjem. Bolšaść junakoŭ sutyknułasia z hetym upieršyniu, i jany nia schilnyja ŭsprymać heta surjozna, čakajuć, što ŭsio samo projdzie. Inšyja ž źviartajucca ŭ palikliniki, ale časta nie tłumačać pachodžańnia symptomaŭ, a heta zaminaje specyjalistam davać adekvatnyja parady.

Parušeńnie snu

Najbolš typovaja prablema, što napatkała vyzvalenych, – parušeńnie snu. Prajaŭlajecca jano ciažkaściami ŭ zasynańni, adčuvańni stomlenaści, niavyspanaści ŭdzień i ŭnočy, ale doŭhija hadziny ŭ ciopłym utulnym łožku efektu nie dajuć, zasnuć ŭdajecca chiba na paŭtary–dźvie hadziny ŭ sutki. Rekamendacyi ŭ dadzienaj situacyi mohuć być nastupnyja: pryśviacicie trochi času sabie i svajmu zdaroŭju.

Pašpacyrujcie pa parku ŭviečary, prymicie ciopłuju vannu z rassłablajučaj pienaj ci nastojem miaty, vypicie miatnaj harbaty, pravietrycie pakoj, uklučycie cichuju instrumentalnuju muzyku i – dabranač!

Narodnymi metadami kštałtu padliku aviečak i kufla ciopłaha piva karystajciesia krytyčna – pieršy z pryviedzienych małaefektyŭny, a druhi moža padniać vas pa chutkim časie praź fizijalahičny mechanizm nievialičkaj, ale nastojlivaj patreby (piva ŭsie ž taki).

Kali prostyja srodki nie spracoŭvajuć, treba źviartacca da medykamentaŭ. Biez receptaŭ u aptekach dastupnyja ziołkavyja preparaty kštałtu ŭlubionaj babulkami «Nastojki valeryjany» i «Novapasitu». Prymajuć ich zvyčajna 2–3 razy na dzień kursam da miesiaca–dvuch. Ale kali prablema nie źnikaje ciaham 4–5 dzion, nieabchodna iści na pryjom da lekara. Da jakoha? Aptymalna da psychaterapeŭta, ale prydasca i neŭrapatolah ci, na skrajni vypadak, zvyčajny ŭčastkovy terapeŭt. Kožny ź ich zmoža vam vypisać recept na bolš surjoznyja preparaty, a psychaterapeŭt (i, časam, neŭrapatolah) dapamohuć sensoŭnaj paradaj.

Hałaŭny bol

Nastupnaja raspaŭsiudžanaja skarha – hałaŭny bol. Zvyčajna spadarožničaje razładam snu i prachodzić razam z narmalizacyjaj rytmaŭ apošniaha. U spałučeńni z padvyšanym ciskam moža być prajavaj abvastreńnia hipertanii (pra chraničnyja chvaroby nižej).

Prablemy sa stravavańniem

Mnohija adčuvajuć prablemy sa stravavańniem. Heta tłumačycca tym, što dastatkova doŭhi čas Vy ŭžyvali niazvykłuju i nia nadta zdarovuju ježu, mała ruchalisia. Z-za hetaha moh parušycca balans mikraflory kišačnika, pra što śviedčać častyja i biezvynikovyja sproby schadzić u prybiralniu. U takim razie rekamendujecca pierajści na dyjetu: na śniadanak jeści kašu, u abied – lohki sup, paravyja katlety z varanaj harodninaj, na viačeru – kisłamałočnyja pradukty. Nie pažadana pić hazavanyja napoi, mocnuju kavu ci harbatu. Varta ŭžyvać dyjetyčnyja chlebcy, vałoskija arechi, čarnaśliŭ, kurahu. Kali ž vam daviałosia pahaładavać bolš za troje sutak zapar, to zvarot da narmalovaha racyjonu musić być pastupovym jak pa składzie, tak i pa abjomie ježy, i adbyvajecca jon nie praz smažanaje sała z bulbaj, a praz rysavuju kašku z varanaj cialacinaj ci kuraj.

Asłableńnie imunitetu

Znachodžańnie ŭ zamknionaj prastory i blizkaje suisnavańnie ź niekalkimi navat samymi lepšymi ludźmi mohuć padarvać systemu vašaha imunitetu. Kali Vy adčuvajecie, što pačali chutka stamlacca, ciažka adnaŭlacca, viartacca da pracy, nastroj mianiajecca raptoŭna, vałasy vypadać, paznohci łamajucca bolš, čym raniej, – čas užyvać polivitaminnyja kompleksy (lepiej ź minerałami). Idealna, kali vybirać preparat Vy budziecie razam ź lekaram. Kali symptomy nia źniknuć, varta pravieści bolš daskanałaje daśledavańnie.

Abvastreńnie chraničnych chvarobaŭ

Ludziam, što mieli da źniavoleńnia chraničnyja chvaroby (hipertanija, chraničny branchit, cukrovy dyjabet i h.d.), nieabchodna nieadkładna schadzić da profilnaha specyjalista na kansultacyju, bo znachodžańnie za kratami mahło ich istotna pahoršyć.

Naahuł, žyćcio ŭ zamknionaj prastory biaź śviežaha pavietra, śviatła, biez mahčymaści padtrymlivać nieabchodnuju hihijenu i ŭ stresavaj sytuacyi nieviadomaści – niaprostaje vyprabavańnie. Prajavicie ŭdziačnaść da svajho arhanizmu i ŭznaharodźcie jaho maksymalnaj kolkaściu stanoŭčych emocyjaŭ, doŭhimi špacyrami na pryrodzie, zdarovaj smačnaj ježaj i žyćciaradasnym seksam! Viasna ž usio-taki!

• 0
• 0
• 0
• 0
• 0
• 0
• 0
• 0