Na leta pucioŭki va ŭsie biełaruskija sanatoryi pradadzieny abo zabraniravany
Na leta pucioŭki va ŭsie biełaruskija sanatoryi pradadzieny ci zabraniravany, paviedamiŭ dyrektar Respublikanskaha centra pa azdaraŭleńni i sanatorna-kurortnym lačeńni nasielnictva Hienadź Bałbatoŭski na pres-kanfierencyi ŭ Minsku 15 krasavika.
Pavodle jaho infarmacyi, płanujecca, što sioleta ŭ sanatoryjach adpačnuć bolš jak 1,3 młn. čałaviek, u tym liku kala 700 tys. za košt srodkaŭ respublikanskaha biudžetu i dziaržaŭnaha sacyjalnaha strachavańnia. Na hetyja mety vydzielena bolš za 1 trłn. rubloŭ.
Siaredniaja cana za dzień lačeńnia pry raźmiaščeńni ŭ standartnym dvuchmiesnym numary –– 265 tys. (za košt srodkaŭ respublikanskaha biudžetu i dziaržaŭnaha sacyjalnaha strachavańnia) i kala 350 tys. rubloŭ (u svabodnaj realizacyi). Bałbatoŭski sprahnazavaŭ, što skačku cen bližej da leta nie adbudziecca.
Jon padkreśliŭ, što z hoda ŭ hod 40% puciovak u sanatoryi Biełarusi nabyvajuć biełaruskija hramadzianie, 60% — zamiežnyja, ź jakich rasijanie składajuć 90%.
Takim čynam, skazaŭ Bałbatoŭski, «havaryć pra niedastupnaść našych sanatoryjaŭ dla biełaruskich hramadzian nie zusim karektna».
Letaś u biełaruskich sanatoryjach adpačyła bolš za 230 tysiač zamiežnych hramadzian. Dla paraŭnańnia: u 2008 hodzie ŭ biełaruskich sanatorna-kurortnych arhanizacyjach prajšło lačeńnie i azdaraŭleńnie 106 tys. zamiežnych hramadzian, u 2009-m — prykładna 130 tys. čałaviek.
Pavodle słoŭ dyrektara Respublikanskaha centra pa azdaraŭleńni i sanatorna-kurortnym lačeńni nasielnictva, rasijanie vybirajuć bolš sučasnyja sanatoryi, imknucca da kamfortu. Naprykład, papularnaściu karystajucca sanatoryi «Junactva», «Aziorny», dzie materyjalnaja baza vyšejšaja za siaredni ŭzrovień. Pavodle ankietavańnia, jakoje pravodzicca siarod pacyjentaŭ sanatoryjaŭ, mienavita miedycynskaja dapamoha źjaŭlajecca padstavaj dla vybaru zdraŭnic, a zabavy i baŭleńnie volnaha času –– na druhim płanie.
Usiaho ŭ Biełarusi 111 sanatorna-kurortnych arhanizacyj na 26.816 miescaŭ. Ź ich 82 sanatoryi na 21.131 miesca, u tym liku 10 dziciačych na 2.467 miescaŭ, 12 dziciačych reabilitacyjna-azdaraŭlenčych centraŭ na 4.081 miesca, 17 studenckich sanatoryjaŭ-prafiłaktoryjaŭ na 1.604 miescy.
Kamientary