U Łuhanskaj i Danieckaj abłaściach całkam abo častkova zabłakavanaja praca 20 z 34 abłasnych vybarčych kamisij (AVK), paviedamiŭ u intervju biełaruskim žurnalistam kiraŭnik adździeła pa suviaziach sa ŚMI Centrvybarkama Ukrainy Kanstancin Chyŭrenka.
Pavodle jaho słoŭ, u Danieckaj vobłaści zabłakavanaja praca 12 z 22 AVK, u Łuhanskaj - 8 z 12. «Ich błakujuć uzbrojenyja pradstaŭniki tak zvanych Danieckaj i Łuhanskaj narodnych respublik, — skazaŭ Chyŭrenka. - Scenar taki: u AVK uzbrojenyja aŭtamatami ludzi prychodziać da tych, chto, pa sutnaści, maje ŭ jakaści zbroi ručku abo, u lepšym vypadku, kampjutar. Dobra, kali abychodzicca bieź cialesnych paškodžańniaŭ abo ŭziaćcia ŭ zakładniki členaŭ AVK, a byli i takija vypadki. U zaležnaści ad nastroju tych, chto pryjšoŭ, kampjutarnaja i arhtechnika albo vynosicca, albo źniščajecca, biuleteni zabirajuć albo spalvajucć, piačatku taksama zabirajuć».
Chyŭrenka adznačyŭ, što na siońnia z-za błakavańnia pracy AVK paśpieli skłaści ŭdakładnienyja śpisy tolki 26 % vybarščykaŭ u Danieckaj i 22 % u Łuhanskaj abłaściach. «Heta značyć, pa-za śpisami apynulisia kala 1,780 młn vybarščykaŭ u Łuhanskaj i 3,3 młn vybarščykaŭ u Danieckaj abłaściach. A heta siomaja častka vybarščykaŭ krainy, — padkreśliŭ jon. — Ale navat tyja, chto trapiŭ u śpisy, jašče nie fakt, što zmohuć prahałasavać, tamu što situacyja mianiajecca, možna skazać, kožnuju hadzinu, i jakoj jana budzie 25 maja, ciažka skazać».
Heta, adnak, nie aznačaje, što vybary va Ukrainie nie adbuducca. «U nas zastajucca jašče 22 vobłaści i horad Kijeŭ, dzie kamisii ŭkamplektavanyja, składzienyja ŭdakładnienyja śpisy vybarščykaŭ i zaviezieny biuleteni, - skazaŭ Chiŭrenka. - Hetyja vybary źjaŭlajucca ahulnanacyjanalnymi. Zakon abviaščaje: CVK, niahledziačy na toje, jakaja kolkaść učastkaŭ i akruhaŭ nie prahałasavała, abaviazana vyśvietlić vyniki hałasavańnia i abjavić prezidenta. Pry hetym daterminovaje hałasavańnie zakonam nie praduhledžana».
Pres-sakratar CVK taksama nahadaŭ, što ŭ Rasiei ŭ 1993 hodzie Respublika Tatarstan, naprykład, nie hałasavała na parłamienckich vybarach, a Čačnia nie brała ŭdziełu ŭ vybarach prezidenta ŭ 1996 hodzie. Adnak lehitymnymi pryznali i parłamienckija, i prezidenckija vybary, padkreśliŭ Chyŭrenka.
«Ź jurydyčnaha punktu hledžańnia vybary va Ukrainie buduć lehitymnyja, navat kali Łuhanskaja i Danieckaja vobłaści nie prahałasujuć u poŭnym składzie, - skazaŭ jon. - Inšaja sprava, što niekatoryja našy susiedzi z-za niehałasavańnia hetych abłaściej buduć dazvalać sabie vypady ab palityčnaj nielehitymnaści vybaraŭ».
Chyŭrenka adznačyŭ, što vynik vybaraŭ va Ukrainie ciažka prahnazavać. «Vynik vybaraŭ niepradkazalny, tamu što heta nie Rasija, a Ukraina. Byŭ by ja staršyniom CVK Rasiei, ja b vam dakładna skazaŭ, jaki vynik budzie na vybarach. A ŭ nas usio niepradkazalna», — adznačyŭ jon.
Kamientary