Adziny asobnik zbornika rarytetaŭ hurtu «J:mors» vykupleny bolš jak za 23 młn rubloŭ

Adziny asobnik zbornika rarytetaŭ «Fotazdymki 2003—2014» biełaruskaha hurtu «J:mors» pradadzieny na adkrytym internet-aŭkcyjonie Ay.tut.by za 23,525 młn rubloŭ.

Cyrymonija pieradačy ŭnikalnaha łota pakupniku adbyłasia 17 červienia ŭ ofisie partała Tut.by.

Dysk vykupleny ad imia biełaruskaj kampanii Digital Gravitation, jakaja zajmajecca raspracoŭkaj mabilnych prahram. Vyručanyja ad prodažu zbornika rarytetaŭ srodki pojduć na leki i delfinaterapiju dla šaścihadovaha Stasa Kiryłava, jaki naradziŭsia z množnymi patałohijami.

Jak paviedamlałasia raniej, kalektyŭ «J:mors» vystaviŭ na tarhi adziny asobnik dyska, kab sabrać hrošy na dapamohu chvoramu chłopčyku, jakoha razam sa starejšym bratam haduje mama: baćka ad ich pajšoŭ. Siamja žyvie na ścipłuju dapamohu ŭ 2,8 młn rubloŭ u miesiac; z-za nieabchodnaści pastajannaha dohladu maleńkaha Stasam mama nie moža pracavać. 

Dabračynny aŭkcyjon u dapamohu chvoramu dziciaci — heta nie pieršy taki prajekt muzykantaŭ, paviedamiŭ lidar «J:mors» Uładzimir Puhač. «Usialaki raz dla nas było pryncypova važnym nie ŭklučacca ŭ abstraktnuju, abiaźličanuju dabračynnaść, słovam, u dabračynnaść jak u biźnies. Zaŭsiody chočacca kankretnamu čałavieku dapamahčy, tady ty zmožaš potym pierakanacca, što čałaviek atrymaŭ hetuju dapamohu», — skazaŭ jon.

«My daŭno chacieli vypuścić dysk svaich rarytetaŭ, bi-sajdaŭ (materyjał, jaki nie ŭvajšoŭ u albomy). Zrabili heta i padumali, što maje sens zaadno pasprabavać kamuści dapamahčy. My pašukali i vybrali Stasa», — dadaŭ Puhač.

Pradstaŭnik boka, jaki nabyŭ dabračynny łot, Siarhiej Ždanovič vykazaŭ mierkavańnie, što biźnies «pavinien być adkryty dla ludziej». «Dabračynnaść, ja liču, źjaŭlajecca nieadjemnaj častkaj biźniesu, — skazaŭ jon. — Nie treba zapasić usio, što my zarablaješ, bo kab u žyćci atrymlivać, treba štości addavać. U hetym płanie ja i maje partniory vystupajem za toje, kab udzielničać u losach inšych ludziej. Dla nas heta, mahčyma, budzie nievialiki ŭkład, a dla inšych ludziej — vielizarnaja suma».

Pavodle słoŭ Ždanoviča, uładalniki adzinaha asobnika zbornika «Fotazdymki 2003—2014» źbirajucca padzialicca jaho źmieścivam ź internet-karystalnikami. «My dajem zhodu na toje, kab «J:mors» raźmiaściŭ hetyja pieśni na svaim infarmacyjnym partale, a taksama kab Tut.by raźmiaściŭ ich u siabie dla ahulnaha spampoŭvańnia. Dumaju, što tvorčaść nie pavinna zastavacca biez karystalnikaŭ, spažyŭcoŭ, jakim jana padabajecca», — padsumavaŭ jon.

• 0
• 0
• 0
• 0
• 0
• 0
• 0
• 0