Kałona rasijskaj braniatechniki ŭjechała va Ukrainu na vačach zachodnich karespandentaŭ

Žurnalistaŭ suśvietnych ŚMI dapuścili ŭ prymiežny rajon, bo tudy zajšoŭ «humanitarny kanvoj», jaki Rasija nakiravała ŭ zonu kanfliktu.

Niepadalok ad miesca, dzie dniom stali łahieram mašyny «humanitarnaha kanvoju», uviečary stała naziracca aktyŭny ruch vajskovaj techniki. Jak raspavioŭ u efiry ŭkrainskaha «Hromadśkoho tielebačieńnia» žurnalist Cimur Aleŭski, kala prapusknoha punktu «Izvaryna» zaŭvažyli niekalki dziasiatkaŭ BTRaŭ.

«Kala 50 BTRaŭ prajechali spačatku ŭ bok prapusknoha punktu Izvaryna, a potym niedzie rastvaryłasia ŭ palach», — raspavioŭ jon.

Takuju ž infarmacyju paviedamiŭ karespandent The New Times, jaki znachodzicca ŭ Kamiensku-Šachcinskim — pamiežnym horadzie Rastoŭskaj vobłaści, pobač ź jakim spyniŭsia «humanitarny kanvoj». Pavodle jaho słoŭ, u kałonie braniatechniki ruchajucca: niekalki dziasiatkaŭ BMP, hruzaviki z sałdatami, hruzaviki, jakija ciahnuć za saboj artyleryju.

Karespandent brytanskaha vydańnia Guardian Šon Uokier paviedamiŭ, što kałona rasiejskaj vajskovaj techniki z aficyjnaj markiroŭkaj zajechała na ŭkrainskuju terytoryju prosta ŭ jaho na vačach. Pry hetym karespandent adznačaje, što heta nie padobna na raptoŭnaje ŭvarvańnie, a vyhladaje, jak zvyčajnaja reč.

Pobač z kałonaj «humanitarnaj dapamohi» ruchajecca kamandny punkt ZRK «Buk» — takoha samaha, ź jakoha źbili małajzijski pasažyrski łajnier. Pra heta paviedamiŭ rasijski žurnalist The New York Times Endru Rot.

Ministerstva zamiežnych spraŭ Rasii patrabuje spynić ahoń u zonie praviadzieńnia ATA dla taho, kab «zabiaśpiečyć biaśpieku» dastaŭki humanitarnaha hruzu. Pra heta havorycca ŭ adpaviednaj zajavie, apublikavanym na sajcie rasijskaha dypłamatyčnaha viedamstva. «U suviazi z ustupleńniem u zaviaršalnuju stadyju šmatpłanavych namahańniaŭ pa adpracoŭcy ŭsich aśpiektaŭ inicyjatyvy akazańnia humanitarnaj dapamohi nasielnictvu paŭdniovaha ŭschodu Ukrainy MZS Rasii nastojliva zaklikaje supraćstajačyja boku terminova zabiaśpiečyć uviadzieńnie režymu spynieńnia ahniu», — havorycca ŭ paviedamleńni. U MZS RF patłumačyli takuju nieabchodnaść «harantavańniem biaśpieki budučaj humanitarnaj akcyi».

Kanvoj u składzie 262 hruzavikoŭ adpraviłasia 12 žniŭnia ŭ bok Ukrainy z Padmaskoŭja. Hruzaviki vajskovyja, śpiešna pierafarbavanyja ŭ bieły koler. Za rulom — sałdaty, pieraapranutyja ŭ skaŭckuju formu. Pavodle aficyjnaj infarmacyi, u hruzie vada, krupy, elektrastancyi. I 30 ton soli, što vyklikała asablivuju reakcyju. Reč u tym, što Danbas sam źjaŭlajecca najbolšym vytvorcam soli ŭ Jeŭropie.

Pozna ŭviečary ŭ sieradu namieśnik kiraŭnika administracyi prezidenta Ukrainy Valeryj Čały śćviardžaŭ, što rasijski humanitarny kanvoj sprabavaŭ prarvacca na terytoryju Ukrainy.

Ministr zamiežnych spraŭ Šviecyi Karł Bilt nazvaŭ infarmacyju pra ŭvachod rasijskaj vajskovaj techniki va Ukrainu «ciažkaj».

Unačy stała taksama viadoma, što dasiahnuta damoŭlenaść pra arhanizacyju trochbakovaj sustrečy prezidentaŭ Pucina i Parašenki i staršyni Jeŭrakamisii Barozu.

Adnačasova ŭčora stała viadoma, što ŭkrainskija tankisty pierarezali trasu Łuhansk—Krasnadon—Izvaryna, takim čynam, zamknuŭšy koła atačeńnia vakoł bajevikoŭ.

• 0
• 0
• 0
• 0
• 0
• 0
• 0
• 0