Ideołahi kančatkova patapili «Zachodniebiełaruskuju Atłantydu» FOTA, VIDEA

Siońnia ranicaj historyka-kulturny muziej-zapaviednik u Zasłaŭi, dzie adbyvajecca vystava «Zachodniebiełaruskaja Atłantyda», naviedali načalnik adździeła ideałohii i kultury Minskaha rajvykankama Siarhiej Kudzin i pradstaŭnik MNS. Paśla karotkaha ahladu vystavy, jaki zaniaŭ piać chvilin, čynoŭniki vynieśli vierdykt: vystavu treba začynić, bo ŭ muziei «nie ŭsio ŭ paradku z elektrapravodkaj». Pra heta karespandentu «Našaj Nivy» paviedamiŭ arhanizatar vystavy, historyk Ihar Mielnikaŭ.

Vystava «Zachodniebiełaruskaja Atłantyda. Historyja Zachodniaj Biełarusi ŭ mižvajenny čas u dakumientach, fotazdymkach i artefaktach» miełasia adčynicca 12 vieraśnia. Jana prymierkavanaja da 75-hodździa pačatku Druhoj suśvietnaj vajny, jakaja pryjšła na zachodniebiełaruskija ziemli ŭ vieraśni 1939-ha.

Vystava adrazu sustreła nieprymańnie ideołahaŭ. Načalnik Hałoŭnaha ŭpraŭleńnia ideałahičnaj raboty Minabłvykankama Rusłan Truchan, pa słovach Mielnikava, naviedaŭ jaje pierad adkryćciom i pabačyŭ niebiaśpieku. «Takaja vystava prynižaje rolu SSSR, pravapierajemnicaj jakoj źjaŭlajecca Biełaruś, a značyć prynižaje i samu Biełaruś», — paŭtaryŭ historyk słovy ideołaha. Aficyjnych papier nichto nie atrymlivaŭ, usio abmiežavałasia słovami: «Rabicie što chočacie, ale vystava nie pavinna pracavać».

Niahledziačy na zabaronu, dyrektar muzieja Mikałaj Pahranoŭski vystavu adčyniŭ. «Majcie mužnaść spakojna ŭsprymać našu historyju!» — skazaŭ jon na adkryćci. Vystava praisnavała ŭsiaho adzin dzień, paśla była začynienaja da skančeńnia pieramovaŭ ź ideołahami.

Na dumku Ihara Mielnikava, jon chacieŭ pakazać mužnaść biełaruskich žaŭnieraŭ polskaj armii padčas Vieraśnioŭskaj kampanii 1939 hoda, jakija pieršymi sutyknulisia z nacysckimi vojskami. Taksama na vystavie płanavałasia pakazać i mirnaje žyćcio Zachodniaj Biełarusi ŭ 1921—1939 hh. praz fota, dakumienty, rečy taho času

Usiaho ŭ ekspazicyi było 300 pradmietaŭ, bolšaja častka ź jakich — aryhinały. Usie hetyja rečy Ihar Mielnikaŭ źbiraŭ nie adzin hod.

Abhruntoŭvać zakryćcio vystavy kiepskaj pravodkaj — dziŭna, kaža Mielnikaŭ. Uletku ŭ muziei zrabili kapitalny ramont na 200 młn rubloŭ. Čamu začynili nasamreč? «Napeŭna, nie chacieli psavać dobraje śviata jadnańnia Biełarusi, jakoje projdzie 17 vieraśnia. Bo pradstaŭlenaja infarmacyja davała zrazumieć, što viartańnie zachodniaj častki Biełarusi da SSSR pryniesła nie tolki radaść uźjadnańnia, ale i straty sa śmierciu», — kaža Mielnikaŭ.

Žurnalisty byli apošnimi, chto pabačyŭ vystavu. Nie prajšło i hadziny paśla vizitu čynoŭnikaŭ, jak supracoŭniki muzieja pryciahnuli torby, kab pakavać ekspanaty.

• 0
• 0
• 0
• 0
• 0
• 0
• 0
• 0