Biełarusy hatovyja vajavać za niezaležnaść — vyniki apytańnia

Padziei va Ukrainie prymusili ŭsich susiedziaŭ Rasii zadumacca. My zapytalisia ŭ roznych ludziej: «Što asabista vy budziecie rabić, kali Rasija zachoča zachapić Biełaruś»? Vynik apytańnia nas uraziŭ, my takoha nie čakali. (Usie apytanyja asoby realnyja.)

Źmicier Daškievič, sustaršynia Maładoha frontu: Jakija tut varyjanty? Idu na front i stralaju. Nasta [žonka] taksama b adstrelvałasia.

Milicyjanier Juryj: Rasija ŭžo zachapiła Biełaruś. A vyviešvańnie ściaha ci inšyja administratyŭnyja pracedury — farmalnaść. Prosty narod pastupova stanovicca «ruskimi ludźmi». Jak milicyjanier, ja toje naziraju. Ale ja biełaruski milicyjanier i stanavicca palicejskim nie źbirajusia.

Ryhor Astapienia, redaktar anłajn-časopisa «Ideja»: Budu supraćstajać! Nie viedaju, u vajskovaj formie ci ŭ pinžaku, u vobrazie doktara ci vyviednika. Usio ž ujaŭlać siabie hierojem pierad manitoram niaciažka, być im na vajnie ciažej.

Andrej Dźmitryjeŭ, lidar «Havary praŭdu»: Šlach adzin: adstojvać suvierenitet. Ale kazać pra kankretnyja kroki zaraz — heta pustoje. Adno viedaju dakładna — nie źjedu.

Alaksiej Mikałajevič, dyrektar centra pazaškolnaj tvorčaści: Ja budu dalej pracavać. Na kanapie ŭsie hieroi. A vajavać… Ja tady budu prosta padkreślivać svaju prynaležnaść da biełarusaŭ.

Ivan Mikałajevič, čynoŭnik: Kali ruski ściah budzie visieć na abładministracyi Homielskaj vobłaści ci Mahiloŭskaj — budu vajavać. Kali ž jon budzie visieć na Karła Marksa, 38, to budu vymušany źjechać z krainy.

Dźmitryj Janienka, žurnalist: Ja nie vieru, što takoje zdarycca. Ale kali što, ja adnaznačna dałučyŭsia b da toj častki Biełarusi, jakaja budzie zmahacca za niezaležnaść.

Anatol Labiedźka, staršynia Abjadnanaj hramadzianskaj partyi: Kali takoje zdarycca, ja vaźmu ŭ ruki zbroju i budu baranić svaju siamju, krainu i budučyniu.

Hanna Šadryna, daśledčyca hiendaru: Ciažkaje pytańnie. Ale kali takoje zdarycca, adrazu telefanujcie mnie i ja dałučusia da zmahańnia, jak zmahu. Heta moža być jak vałanciorskaja dziejnaść ci arhanizacyja padtrymki frontu, hatavańnie ježy dla ludziej, jakija buduć zmahacca.

Andrej Pačobut, žurnalist: Ja, kaniečnie, bolš aptymistyčna nastrojeny, choć pryznaju, što pahroza takaja isnuje. Ale taksama dałučyŭsia b da tych 14%, jakija hatovyja stajać za Biełaruś.

Aleh Hajdukievič, namieśnik staršyni Libieralna-demakra-tyčnaj partyi: Kali takoje adbudziecca, to budziem vinavaty tolki my sami i nichto inšy. Toje, što Ukraina zhubiła svaje rehijony — vina jaje minułaj ułady, jakaja zajmalisia čym zaŭhodna, tolki nie svajoj krainaj. Nam ža treba raścić svaju elitu, raźvivać nacyjanalny honar, udaskanalvać uładnuju sistemu, i tady kazać pra niejki tam zachop nam nie pryjdziecca. Nam treba być mocnymi! Kali ž ujavić advarotnaje, to našaja partyja, i ja ŭ tym liku, budziem rabić usio ad nas zaležnaje, kab zachavać cełasnaść i abaranić Biełaruś, chto b tam ni kazaŭ, što my prarasijskija.

Anatol Bajdačny, były hałoŭny trenier zbornaj Biełarusi pa futbole: Ja palitykaj nie zajmajusia. Ja za Biełaruś jak niezaležnuju krainu, ale pry hetym chaču, kab u nas z Rasijaj byŭ ščylny sajuz. Navošta nam iści ŭ Jeŭropu, hublać svaju niezaležnaść i žyć padačkami? Ja za siabroŭstva Biełarusi, Rasii i Ukrainy ŭ supraćstajańni z anhłasaksami.

Valaryna Kustava, televiadučaja: Ja pajšła b na vajnu. Pamaliłasia b, i pajšła.

• 0
• 0
• 0
• 0
• 0
• 0
• 0
• 0