Jeŭrakamisar: «Hazprom» pahadziŭsia na kampramis u pytańni pastavak hazu Ukrainie
ES, Ukraina i Rasija dasiahnuli papiaredniaj damovy ab zabieśpiačeńni pastavak hazu na praciahu zimovaha pieryjadu.
«My ŭzhadnili važnyja klučavyja punkty «zimovaha pakieta». My vierym, što moža być adčuvalnaje rašeńnie dla zabieśpiačeńnia nadziejnaści pastavak hazu zimoj», — skazaŭ kamisar ES pa pytańniach enierhietyki Hiunter Etynhier na bryfinhu pa zakančeńni trochbakovaj sustrečy ź ministrami enierhietyki Rasii Alaksandram Novakam i ministram enierhietyki i vuhalnaj pramysłovaści Ukrainy Juryjem Prodanam u Bierlinie.
Pavodle jaho słoŭ, Ukrainie dla prachodžańnia zimy nieabchodna ad 5 da 10-12 młrd kubamietraŭ.
Kamisar adznačyŭ, što ŭ adpaviednaści z dasiahnutymi papiarednimi damoŭlenaściami, Ukraina da kanca kastryčnika pieraličyć «Hazpromu» $2 młrd u vyhladzie apłaty za raniej pastaŭleny haz, a da kanca hoda — jašče $1,1 młrd. Pry hetym, Jeŭrakamisija paprosić Mižnarodny valutny fond ab pradastaŭleńni nieabchodnych harantyj Ukrainie.
Kamisar taksama adznačyŭ, što pakolki raniej i «Naftahaz Ukrainy», i «Hazprom» źviarnulisia ŭ Stakholmski arbitraž dla vyrašeńnia sprečki ab canie pastaŭlenaha hazu, to ŭ vypadku, kali Stakholmski arbitraž pahodzicca z ukrainskimi dovadami adnosna taho, što cana za haz, pastaŭleny ŭ listapadzie-śniežni 2013 hoda i z krasavika pa červień 2014 hoda, pavinna składać $285 za tysiaču kubamietraŭ, heta budzie aznačać, što Ukraina całkam pahasiła svaje daŭhi.
U vypadku, kali sud prymie rasiejski bok, Ukrainie pryjdziecca dapłacić jašče $2 młrd.
Etynhier taksama adznačyŭ, što baki pavinny ŭ bližejšyja dni pravieści kansultacyi sa svaimi uradami z tym, kab na nastupnym tydni, kali nie budzie piarečańniaŭ, zamacavać dasiahnutyja damoŭlenaści.
«Da kanca nastupnaha tydnia my možam mieć abaviazkovy da vykanańnia pratakoł», — skazaŭ kamisar.
Akramia taho, Jeŭrakamisija prosić Kijeŭ pahadzicca na zakupku 5 młrd kuboŭ hazu pa $385 dalaraŭ za kub pa pieradapłacie.
Paśla pryniaćcia takoha kampramisnaha «zimovaha pakieta» baki buduć čakać vyraku Stakholmskaha arbitražu.
JEK, Rasija i Ukraina pa roznamu traktujuć vyniki pieramovaŭ ab pastaŭkach hazu.
Z adnaho boku Rasija i Jeŭrakamisija, z druhoha boku Ukraina pa-roznamu paviedamili pra vyniki pieramoŭ ab urehulavańni hazavaj prablemy pamiž Maskvoj i Kijevam.
I kali pradstaŭniki JEK i Minenierha RF zajavili ab prapanovie Kijevu pahasić $3,1 młrd daŭhoŭ da kanca hoda, to ministr paliva i enierhietyki Ukrainy Juryj Prodan zajaviŭ, što rasijski bok i tak pavinien Kijevu $6 młrd pierapłaty za haz — i $3,1 młrd razhladajecca nie jak apłata pastavak 2013 i pačatku 2014 hoda, a jak pieradapłata pastavak na budučuju zimu.
«My hatovyja vykarystoŭvać hetuju sumu dla raźlikaŭ i apłaty za haz. My, jak kampramis, prapanoŭvali i hatovyja zrabić pieradapłatu — kali havorka idzie pra pastaŭku za 5 młrd kubamietraŭ, to heta budzie $1,9 młrd, a ŭ kancy miesiaca pravieści kančatkovy raźlik», — skazaŭ ukrainski ministr.
Premjer Ukrainy Arsień Jacaniuk ličyć mahčymym zaklučeńnie časovaha damovy na pastaŭki rasijskaha hazu da kančatkovaha Stakholmskaha arbitražu, piša «Ukrainskaja praŭda».
Pra heta jon paviedamiŭ na bryfinhu ŭ aeraporcie «Baryspal» paśla viartańnia z Złučanych Štataŭ.
«Naša ahulnaja pazicyja ź Jeŭrapiejskaj kamisijaj da kančatkovaha rašeńnia Stakholmskaha suda — nam treba padpisać časovaje pahadnieńnie ab pastaŭkach pryrodnaha hazu», — skazaŭ jon.
Pry hetym Jacaniuk adznačyŭ, što ŭmovy takoha dahavora byli ŭzhodnienyja ź jeŭrapiejskimi partniorami.
Jak viadoma, Jacaniuk ličyć mahčymym vyniasieńnie rašeńnia Stakholmskim arbitražam pa pazovie «Naftahazu» da «Hazpromu» ŭ vieraśni 2015 hoda.
Kamientary