Jak trapiŭ va ŭładu aŭtar «samych sučasnych trafikaŭ»: historyja žyćcia vice-premjera Anatola Kalinina
U struktury biełaruskaha ŭrada piać vice-premjeraŭ. Uładzimir Siamaška viadzie pieramovy pa nafcie i hazie. Hieroj Biełarusi Piatro Prakapovič raźmiarkoŭvaje dziaržaŭnyja resursy. Anatol Tozik fantaniruje idejami. A Michaił Rusy vinavata ŭśmichajecca, kali jaho ŭ čarhovy raz krytykuje Łukašenka.
A jość jašče Anatol Kalinin. Jon kuryruje budaŭnikoŭ i kamunalščykaŭ — śfiery, da jakich u ludziej najbolš pretenzij.
Ale pry hetym jon nie zaśviaciŭsia ni ŭ adnoj skandalnaj historyi, nie daŭ badaj nivodnaha intervju pa niepracoŭnych pytańniach. Chto jon i adkul?
Nie cyhan, a sibirak
Kali nabrać u internecie imia «Anatol Kalinin», to pošukavaja sistema Google adrazu padkazvaje: «cyhan». Takija čutki pra čynoŭnika chodziać daŭno: vice-premjer vyhladaje samym smuhłym u biełaruskim uradzie.
«Jon taki, jak cyhanio», — śmiejučysia, pahadžajecca stryječnaja siastra Nadzieja Skačkova. I raskazvaje, što Anatol nasamreč padobny da babuli-sibirački. Dyj jahonyja dzieci taksama smuhłyja.
A što da čutak u internecie, to tłumačeńnie prostaje: poŭny ciozka vice-premjera, danski piśmieńnik Anatol Kalinin, napisaŭ u savieckija časy raman «Cyhan».
Zabrudžanaja zona
Małaja radzima Kalinina — Krasnapolle. Rajon trapiŭ u lik tych, što paciarpieli ad Čarnobylskaj katastrofy. Kolkaść nasielnictva ŭ miastečku skaraciłasia da 6 tysiač čałaviek, a ŭsie pramysłovyja pradpryjemstvy zakrylisia. Miascovyja žychary žyvuć u čakańni adkryćcia novaha fizkulturna-azdaraŭlenčaha kompleksu. Kapsułu z pasłańniem naščadkam na miescy jahonaha budaŭnictva Anatol Kalinin zakłaŭ hod tamu. Čyrvonaje dvuchpaviarchovaje zbudavańnie ŭžo ciapier vydzialajecca na fonie šeraha miastečka.
Vice-premjer štohod pryjazdžaje ŭ Krasnapolle na Radaŭnicu, kab naviedać mahiły baćkoŭ.
Były dom siamji znachodzicca jakraz niepadalok ad haradskich mohiłak, adnak pra Kalininych u chacie nie nahadvaje ničoha. Novaja haspadynia, uśmichajučysia, pakazvaje adziny znojdzieny artefakt — nadrapany nadpis «Tola» na došcy ŭ łaźni.
Sam Kalinin pry patrebie spyniajecca na načoŭku ŭ stryječnaj siastry. «Lažam valetam i razmaŭlajem pra žyćcio. My navat nie ličym, što stryječnyja, — pryznajecca jana. — Jak rodnyja».
Maci čynoŭnika ŭsio žyćcio pracavała siastroj-haspadyniaj u rajonnaj balnicy, a voś baćka byŭ cieślarom. Heta jahony rod pachodziŭ ź Sibiry. U siamji padrastała dvoje synoŭ, starejšy Jaŭhien i małodšy Anatol.
Biez prahi da vučoby
Niepadaloku ad doma Kalininych znachodziłasia škoła, taja samaja, jakaja pryniesła Krasnapollu trahičnuju viadomaść. U kancy 1990-ch navučalnaja ŭstanova była całkam pierabudavanaja. Ci to praz pamyłku prajekciroŭščykaŭ, ci to praz nadzvyčajnyja mieteaŭmovy mienavita ŭ joj 27 studzienia 2004 abvaliŭsia dach, pachavaŭšy pad saboj adnaho z vučniaŭ i nastaŭnika fizkultury.
U škole budučy vice-premjer vučyŭsia siarednie, uzhadvaje jahony adnakłaśnik i najlepšy siabar Anatol Klujeŭ. Praciahvać adukacyju jon nie źbiraŭsia i pajšoŭ pracavać kiroŭcam na aŭtabazu rajspažyŭsajuza. Vaziŭ načalnika. Toj i pierakanaŭ chłopca pastupać. U bijahrafii vice-premjera vučoba ŭ mahiloŭskim vučyliščy nie ŭzhadvajecca. Zatoje jakraz jość «dzirka» na niekalki hadoŭ miž słužbaj u vojsku (Kalinin apynuŭsia ŭ Połacku) i pačatkam pracy ŭ krasnapolskaj rajahrapramtechnicy.
Žonka — z kulturnaj śfiery
Tym časam Anatol pabraŭsia šlubam sa svajoj adnahodkaj Tamaraj Savik. Dziaŭčyna vyrasła ŭ Ivacevickim rajonie, a ŭ Krasnapolli apynułasia pa raźmierkavańni. Tamara pracavała ŭ kłubie masavikom-zabaŭnikam.
Jana skončyła Mahiloŭskaje vučylišča kultury, a ź ciaham času jašče i Biełaruski dziaržaŭny ŭniviersitet kultury i mastactva. Adnak u hetaj śfiery vialikich hrošaj nie zarobiš.
Kali muž uznačalvaŭ baranavicki vodakanał, žonka była inžynieram pa inavacyjnaj pracy. Cikava, što paśla pryznačeńnia Anatola ŭ Minsk Tamara nie źbirałasia sychodzić z pracy i pierajazdžać u stalicu. «Mianie ž nichto nikudy nie pryznačaŭ», — kazała jana žurnalistam baranavickaj haziety «Inteks-Pres».
Pierajezd na zachad
U Krasnapolli siamja žyła da 1990 hoda, a paśla pierajechała ŭ Baranavičy, dzie Anatol uznačaliŭ adzin z ŽESaŭ. Što prymusiła rezka źmianić abstanoŭku?
Siastra čynoŭnika ŭzhadvaje, što ŭ Baranavičy pierabraŭsia siabar Kalinina, jaki i klikaŭ jaho da siabie. U adnakłaśnika Anatola Klujeva inšaja viersija. Jon vykazvaje zdahadku, što siamja prosta pierajechała bližej da rodnych miaścinaŭ Tamary.
Zrešty, paśla Čarnobyla z zabrudžanaha Krasnapolla ŭciakali mnohija, chto kłapaciŭsia pra siabie i zdaroŭje dziaciej.
34-hadovy student
Pavodle aficyjnaj bijahrafii, vice-premjer maje dźvie vyšejšyja adukacyi. U 1993-m Kalinin atrymaŭ dypłom u sielskahaspadarčaj akademii ŭ Horkach. Na toj momant jamu było ŭžo 34 hady — rekord siarod ciapierašnich biełaruskich čynoŭnikaŭ vyšejšaha ranhu. Kalinin tady ŭznačalvaŭ adzin z ŽESaŭ u Baranavičach. Pryčym śpiecyfika jaho pracy nijak nie spałučałasia z atrymanaj śpiecyjalnaściu. U Horkach jon atrymaŭ viedy pa… miechanizacyi sielskaj haspadarki.
Druhi dypłom Kalinin atrymaŭ u Akademii kiravańnia. Za hod da pierajezdu ŭ Minsk 49-hadovy baranavicki kamunalščyk vyvučyŭsia pa śpiecyjalnaści «dziaržaŭnaje i miascovaje kiravańnie». Takuju samuju pierapadrychtoŭku prajšli dziasiatki inšych čynoŭnikaŭ.
Paśpiachovy mieniedžar
Baranavickim vodakanałam Kalinin kiravaŭ efiektyŭna. Jaho zaŭvažyli, i praz paŭtara dziesiacihodździa pryznačyli pamočnikam Alaksandra Łukašenki — inśpiektaram pa Minsku. Kaliści taki ž uźlot z Baranavičaŭ u stalicu ździejśniŭ inšy čynoŭnik — staršynia baranavickaha harvykankama Michaił Paŭłaŭ. Ale karjerny rost Kalinina byŭ bolš niečakanym i dla paspalitaha ludu nievytłumačalnym.
«Łukašenka pieršy raz pryjechaŭ, vidać, prapanavaŭ jamu, druhi raz pryjechaŭ, a na treci i nie pytaŭsia — pieravioŭ», — takuju viersiju prapanuje siastra Kalinina Nadzieja Skačkova. «Nie adrazu pahadziŭsia?» — «Nu, maŭčaŭ — i ŭsio».
Inšaja papularnaja viersija — chakiejnaja. Kalinin zasnavaŭ u Baranavičach amatarskuju kamandu.
Hulaŭ u joj i sam, praŭda, nie nadta ŭdała. Tym nie mienš, pad jahonym kiraŭnictvam «Baranavičy» ŭvachodzili ŭ trojku pryzioraŭ na mižnarodnym turniry. Viedajučy luboŭ da hetaha vidu sportu Alaksandra Łukašenki, mnohija źviazvajuć chakiejnyja i namienkłaturnyja pieramohi Kalinina.
«Kali ludzi miarkujuć, što niejkija suviazi dapamahli, to jany mocna pamylajucca. Jaho prosta rekamiendavali jak dobraha rabotnika», — pierakonvaje adnakłaśnik vice-premjera Anatol Klujeŭ.
Kalinina niekalki razoŭ pryznavali ŭ Baranavičach Čałaviekam hoda.
Staličny čynoŭnik
Nie majučy svajho žylla, u Minsku čynoŭnik spačatku pasialiŭsia na terytoryi prezidenckaj rezidencyi «Drazdy». U pryvatnaści, tudy da jaho pryjazdžaŭ jahony brat Jaŭhien Kalinin, jaki pracuje na Zaparožskaj AES va Ukrainie.
A mienš čym praz hod Kalininu ŭ Minsku vydzielili ziamlu pad budaŭnictva. Tut ža, u Drazdach. Jon trapiŭ u kampaniju byłoha pamočnika Łukašenki, a ciapier namieśnika ministra zamiežnych spraŭ Valancina Rybakova i staršyni Viarchoŭnaha suda Valancina Sukały. Šykoŭnaje miesca: prestyžny rajon, najlepšaja infrastruktura i vodaachoŭnaja zona Śvisłačy.
Siastra čynoŭnika raskazvaje, što Kalinin z žonkaj pasialilisia ŭ katedžy, a kamuści ź dziaciej pakinuli staličnuju kvateru. Starejšaja, Alona, pa słovach svajački, stała dziciačym doktaram, a małodšy syn, Vital, zajmajecca biznesam. Anatol Kalinin trojčy dziadula. Sioleta jaho starejšaja ŭnučka pajšła ŭ pieršy kłas.
«Narmalny chłopiec. Niejak ža prabiŭsia! Pašancavała. Boh dobrym ludziam daje», — apisvaje Nadzieja Skačkova karjeru svajho stryječnaha brata niekalkimi frazami.
* * *
Daviedka
Anatol Kalinin naradziŭsia 21 červienia 1959 u Krasnapolli Mahiloŭskaj vobłaści. Skončyŭ Biełaruskuju sielskahaspadarčuju akademiju (1993) i Akademiju kiravańnia (2008).
Byŭ šafioram u aŭtabazie rajspažyŭsajuza Krasnapolla (1976–1977), słužyŭ u vojsku (1977–1979). U 1983–1988 pracavaŭ inžynieram-technołaham, hałoŭnym inžynieram rajahrapramtechniki Krasnapolla, u 1988–1990 — namieśnik dyrektara, a paśla dyrektar Krasnapolskaha rajonnaha abjadnańnia ŽKH.
U 1990–1995 — načalnik ŽESa ŭ Baranavičach, u 1995–2009 — dyrektara baranavickaha «Vodakanała».
U 2009–2010 — pamočnik prezidenta, hałoŭny inśpiektar pa Minsku, z 2010 — vice-premjer.
Usio zdaryłasia na Novy hod. Śmierć samaj publičnaj supracoŭnicy minskaha AMAPa dahetul pakidaje pytańni10
Kamientary