U čaćvier z frakcyi krajnich pravych u Jeŭrapiejskim parłamiencie, EFDD (Jeŭropa za svabodu i pramuju demakratyju), vyjšła pradstaŭnica Łatvii. Jaje vychad aznačaje, što hrupa EFDD pavinna spynić svajo isnavańnie.
Ab vychadzie łatvijskaj deputatki Iviety Hryhuł z EFDD abviaściŭ prezident Jeŭrapiejskaha parłamienta Marcin Šulc. Brusielskaje vydańnie European voice nahadvaje, što heta ciahnie za saboj likvidacyju hrupy, pakolki ciapier hrupa nie adpaviadaje patrabavańniam JEP.
U hrupu EFDD uvachodziać radykalnyja pravyja partyi, pieravažnaja bolšaść jakich trapiła ŭ JEP ŭpieršyniu. Hrupa hałasavała suprać ratyfikacyi Pahadnieńnia ab asacyjacyi z Ukrainaj, a jaje pradstaŭniki nie chavajuć svajoj łajalnaści da Kramla.
Lidar hrupy Najdžeł Faradž nazyvaŭ Pucina «lidaram, jaki vyklikaje zachapleńnie».
Usie členy hrupy źjaŭlajucca «jeŭraskieptykami», pieravažnaja bolšaść vykazvajecca za vychad ich krainy ź ES.
Pa rehłamiencie JEP palityčnyja hrupy (frakcyi) pavinny składacca ź jak minimum 25 deputataŭ, jakija pradstaŭlajuć jak minimum 8 krain ES. EFDD da hetaha času adpaviadaje pieršamu kryteryju, u joj zastałosia 48 siabroŭ (usiaho ŭ JEP 751 deputat). U toj ža čas, lik pradstaŭlenych krain źmienšyŭsia da 7.
U vypadku, kali EFDD nie vyrašyć prablemu ŭ karotki termin, jana budzie likvidavanaja, a rehłamientnyja paŭnamoctvy «siabroŭ Pucina» ŭ Jeŭraparłamiencie pamienšacca.
BBC adznačaje, što pryčyny vychadu Hryhuł z hrupy dakładna nieviadomyja. Miž tym, deputaty JEP ŭžo nazvali hetu padzieju «parazaj jeŭraskieptykaŭ».
Ciapier čytajuć
Palitołah Alina Charysava pahadziłasia supracoŭničać z SBU. Akazałasia, heta było KDB52
Kamientary