Zborščyk podpisaŭ za «Narodny refierendum» atrymaŭ troje sutak aryštu
Troje sutak administracyjnaha aryštu atrymaŭ siabra Ruchu «Za Svabodu», zborščyk podpisaŭ Uładzisłaŭ Kašaloŭ. Sud paličyŭ, što jon pravodziŭ schod žycharoŭ internata.
«Marazm pieramoh!» - prakamientavaŭ sajtu Pyx.by prysud pieršy namieśnik staršyni Ruchu «Za Svabodu», adzin ź lidaraŭ «Narodnaha refierendumu» Juraś Hubarevič.
Pa jahonych słovach, «sudździa Paŭłoŭskaja, abapirajučysia na pakazańni śviedki Zinaidy Kazłoŭskaj, znajšła ŭ dziejańniach zborščyka podpisaŭ prykmiety praviadzieńnia schoda žycharoŭ internata na adnym z pavierchaŭ». «Čaho, na samoj spravie, nie było ni ŭ realnaści, ni navat u pratakole», - padkreśliŭ Hubarevič.
U vyniku — troje sutak administracyjnaha aryštu, adznačyŭ jon. Pa jahonych słovach, prysud — biesprecedentny i budzie abskardžany.
Kašaloŭ byŭ zatrymany 30 kastryčnika ŭ Minsku nibyta za padrychtoŭku masavaha mierapryjemstva.
Uviečary 28 kastryčnika ŭ internacie adnaho z prafiesijna-techničnych kaledžaŭ padčas zboru podpisaŭ za «Narodny refierendum» jaho zatrymała namieśnica dyrektara pa vychavaŭčaj pracy navučalnaj ustanovy i kiraŭnica rajonnaj arhanizacyi «Biełaj Rusi» Zinaida Kazłoŭskaja. Jana vyklikała milicyju, ale chłopiec syšoŭ da pryjezdu naradu.
30 kastryčnika pradstaŭniki «Narodnaha refierendumu» pasprabavali sustrecca z Kazłoŭskaj, kab patłumačyć niezakonnać jejnych dziejańniaŭ, ale jana znoŭ vyklikała milicyju. Milicyjanty paličyli, što refierendum – heta masavaje mierapryjemstva, tamu zborščyk vinavaty ŭ art. 23.34 (padrychtoŭka praviadzieńnia masavaha mierapryjemstva) KoAP. Kašaloŭ byŭ zatrymany da suda, jaki raspačaŭsia 30 kastryčnika. Adnak u toj dzień sudździa nie zdoleła pryniać rašeńnia, i siabra Ruchu «Za Svabodu» byŭ vyzvaleny z-pad varty. Siońnia sud praciahnuŭsia.
Kamientary