Asudžany da śmiarotnaha pakarańnia žychar Homiela Alaksandr Hrunoŭ rasstralany. Pra heta stała viadoma 4 listapada ad jaho maci Volhi Hrunovaj, piša spring96.org.
Volha Hrunova raspaviała pravaabaroncam, što atrymała paštovaje apaviaščeńnie, u jakim značyłasia, što joj pryjšła pasyłka «da zapatrabavańnia». U hetaj pasyłcy byli rečy, u jakich Alaksandr byŭ apranuty padčas znachodžańnia ŭ kamiery śmiarotnikaŭ minskaj turmy Vaładarki.
Dniom raniej pravaabaroncam stała viadoma, što Alaksandru Hrunovu było admoŭlena ŭ pamiłavańni: jaho sprava 13 kastryčnika pastupiła ŭ Homielski abłasny sud z adpaviednaj paznakaj.
Nahadajem, u krasaviku byli rasstralanyja 23-hadovy student Pavieł Sialun i 45-hadovy Ryhor Juzepčuk. Na siońniašni dzień pravaabaroncam viadoma pra jašče adnaho asudžanaha, jaki čakaje vykanańnia prysudu, - 54-hadovaha Eduarda Łykava.
***
Alaksandr Hrunoŭ pryznany vinavatym u zabojcu homielskaj studentki Natalli Jemieljančykavaj.
Dziaŭčyna zahinuła ŭ vieraśni 2012 hoda - joj było naniesiena bolš za 100 nažavych ranieńniaŭ. Heta zabojstva Hrunoŭ ździejśniŭ praz hod paśla adbyćcia pakarańnia za žorstkaje źbićcio sužyciela svajoj maci, u vyniku jakoha toj skanaŭ.
Pieršy śmiarotny prysud Hrunovu Homielski abłasny sud vynies u červieni 2013 hoda, adnak praz čatyry miesiacy Viarchoŭny sud Biełarusi admianiŭ prysud i nakiravaŭ spravu na novy sudovy razhlad u sud pieršaj instancyi. U śniežni 2013 Homielski abłasny sud paŭtorna vynies śmiarotny prysud Hrunovu. U krasaviku hetaha hoda Viarchoŭny sud pakinuŭ prysud bieź źmieny.
Łukašenkaŭcy ŭpieršyniu za doŭhi čas pakazali Viktara Babaryku19
Kamientary