Ksiondz Łazar ciapier słužyć u Kamieni

Paśla vychadu z «amierykanki» śviatar peŭny čas byŭ na reabilitacyi ŭ Vilejskim rajonie. Ciapier atrymaŭ novaje miesca słužby, paviedamlaje žurnalist haziety Luboŭ Łuniova.

…Dom ksiandza Uładzisłava Łazara znachodzicca praz darohu ad kaścioła ŭ vioscy Kamień pad Iviancom. Chram pabudavali sami sialanie ŭ 1990-ja hady na miescy spalenaha ŭ čas vajny draŭlanaha.

«Voś tut ścieny treba raŭniać. U kaściole i aciapleńnia niama zusim. Treba hetaje pytańnie vyrašać», — pakazvaje ajciec Uładzisłaŭ spadčynu. Niahledziačy na budzień, u kaścielnaj zale bolš za 30 čałaviek, pieravažna žančyny. I heta ŭ viaskovym kaściole!Vakoł kaścioła płot, vykładzieny z kamianioŭ. Kab uratavać hetuju pryhažość, śviatar śpiłavaŭ vializnyja drevy. «Karani pačali ŭžo razburać płot. A voś tut treba budzie viasnoj arać, baranavać, zraŭniać pavierchniu, kab pasiejać hazonnuju travu. Budzie vielmi pryhoža! Nu a z budynkam raboty tut šmat. Treba ž i ścieny ŭciaplić, stol pryvieści da ładu, padłohu, vokny, kacioł patrebny, kab było ciopła. Usio heta treba budzie rabić, jak tolki nadvorje dazvolić.. Vuń niekatoryja materyjały ŭžo zakupleny», — praciahvaje ksiondz Łazar.

Płanaŭ šmat. Navat u svaim domie haścinny haspadar pakazaŭ, što i jak budzie pieraroblena: «Voś u toj častcy doma treba budzie tuju ścianu razburyć i zrabić zału dla dziaciej. Budzie vielmi ŭtulna i pryhoža. Hetuju piečku treba budzie razburyć taksama, bo ad jaje mała tołku». U mianie niama nijakaha sumnievu ŭ tym, što płany ździejśniacca, bo bačyła vyniki raboty ŭ Marjinaj Horcy. Da taho ž ksiondz u toj čas, kali pabudavaŭ kaścioł, raspačaŭ budaŭnictva i ŭ Rudziensku. Ci šmat na śviecie ludziej, jakija ŭ svaim žyćci pabudavali chacia b adzin chram? U jakoj krainie takoha čałavieka trymali b za kratami bolš za paŭhoda?!

«Ci budziecie dabivacca kampiensacyi?» — zapytvajusia ja.

U adkaz: «Dy nie. Zabyć toje, što tam było, ja nikoli nie zmahu, a pa kampiensacyju źviartacca nie budu». Na raźvitańnie spadar Łazar skazaŭ, što čytaŭ pra aryšt žurnalista Alesina (na momant našaj sustrečy jon jašče nie vyjšaŭ na volu). «Samaje važnaje ŭ takoj spravie — heta padtrymka. Ja vielmi ŭdziačny svaim rodnym, siabram, usim tym ludziam, jakija za mianie malilisia i vykazvali salidarnaść. Niachaj Boh dapamahaje», — skazaŭ śviatar. Hetyja słovy hučali ŭsiu darohu da Minska ŭ viačernim tumanie. Niachaj nam usim dapamahaje Boh.

* * *

Ksiondz z Barysava Uładzisłaŭ Łazar byŭ aryštavany ŭ kancy maja 2013. Śviatara vinavacili u pieradačy hrošaj i materyjalnych kaštoŭnaściej čałavieku, jaki abvinavačvajecca ŭ špijanažy na karyść inšaj dziaržavy pavodle p. 1 art. 356 Kryminalnaha kodeksa (zdrada dziaržavie). Jaho kryminalnaja adkaznaść vyznačajecca p. 6 art. 16 KK (sadziejničańnie ŭ złačynstvie), što praduhledžvaje termin pakarańnia ad 7 da 15 hadoŭ. Ks. U. Łazara trymali ŭ turmie SIZA KDB u Minsku i vyzvalili 3 śniežnia pad padpisku pra niavyjezd. Jaho sprava ŭ sud tak i nie trapiła.

• 0
• 0
• 0
• 0
• 0
• 0
• 0
• 0