U Ministerstvie ŭnutranych spraŭ Biełarusi 29 śniežnia padviedzienyja vyniki pracy Hramadskaha savieta pry MUS u 2014 hodzie.
Jak paviedamlaje ministerstva, pavodle słoŭ staršyni savieta, kiraŭnika Biełteleradyjokampanii Hienadzia Davydźki, MUS u 2014 hodzie vyhladała pryhoža, pracavała dakładna, biez narakańniaŭ kiraŭnictva krainy i navat staviłasia ŭ prykład. Z boku hramadskaści taksama było poŭnaje razumieńnie dziejańniaŭ milicyi. Usio heta, jak havorycca ŭ paviedamleńni, «nie mahło nie paŭpłyvać na rost aŭtarytetu sałdat pravaparadku. Urešcie, sami členy Hramadskaha savieta taksama vyznačylisia plonnaj dziejnaściu kožny na svaim miescy. Heta jašče adno paćviardžeńnie, što hetyja ludzi nie prosta pradstaŭlajuć saviet, a źjaŭlajucca lidarami ŭ svaim siehmiencie prafiesijnaj dziejnaści».
Namieśnik ministra ŭnutranych spraŭ hienierał-major milicyi Alaksandr Kobrusieŭ padziakavaŭ členam savieta za aktyŭny ŭdzieł, jaki jany ŭziali i biaruć u žyćci orhanaŭ unutranych spraŭ, pra što krasamoŭna śviedčać vyniki. «Usio, što abmiarkoŭvałasia na pasiadžeńniach savieta sioleta, ci heta ŭzmacnieńnie baraćby z narkotykami, ci ŭmacavańnie dyscypliny, — tak ci inakš znajšło svajo ŭvasableńnie ŭ realnych zakanadaŭčych aktach, skiravanych na azdaraŭleńnie hramadstva. A šerah inicyjatyŭ jašče čakajuć svajoj čarhi, naprykład pa baraćbie z pjanstvam», — havorycca ŭ paviedamleńni MUS.
Kamientary