10 vydatnych hulniaŭ, jakija nie źjavilisia na kampjutarach

Amal paŭtara hoda uładalniki Playstation i Xbox hulajuć u samuju kasavuju hulniu śvietu, GTA V. Jaje vychad da piersanalnych kampjutaraŭ nie raz adkładaŭsia, apošniaja na siońnia data — 24 sakavika (na Dzień Voli ŭ niekatorych budzie vyklučna chatniaje śviata).

Dy ŭsio nie tak drenna z GTA, mnohija vydatnyja hulni naohuł nie vychodzili i nie vyjduć dla piersanalnych kampjutaraŭ. Sprava nie ŭ lanocie raspracoŭščykaŭ: najaŭnaść takich ekskluzivaŭ moža stać dla kahości hałoŭnaj pryčynaj nabyć tuju ci inšuju kansol.

Halo 4

Aryhinalnaja «stralałka» Halo: Combat Evolved i jaje praciah Halo 2 byli ŭspryniatyja hulcami na PK nie toje kab admoŭna, ale kvoła. Tym časam dla ŭładalnikaŭ Xbox sieryja stała kultavaj. Halo 3 vyjšła ŭžo tolki dla «łajalnaj» płatformy i atrymała 10 z 10 bałaŭ ad šerahu viadomych krytykaŭ. Čaćviertaja častka atrymała trochu horšyja (kala 9 z 10) vodhuki, ale pabiła rekordy sieryi pa kasavych zborach. Halo 5, što vyjdzie ŭ hetym hodzie, taksama stanie ekskluziŭnaj dla Xbox. Ad jaskravaha ekšenu, nasyčanaha suśvietu i epičnaj historyi Halo, što zaŭvažna razraślisia z časoŭ Halo 2, «kampjutarščykam» dastaniecca tolki Kartana — hołas šyzafreničnaj pamočnicy Majstra Čyfa stanie hałasavym asistentam u Windows 10.

Heavy Rain

Studyja Quantic Dream niekali paciešyła «kampjutarščykaŭ» šykoŭnym kvestam Fahrenheit, ale dalej syšła na Playstation. I kali biez sprečnaj Beyond: Two Souls žyć možna, to interaktyŭny film Heavy Rain svajoj ekskluziŭnaściu dla Playstation mnohich uvahnaŭ u smutak. Takoha zmročnaha detektyvu z takoj kolkaściu vydatnych piersanažaŭ na PK prosta nie adšukać. Dy i karcinka hulni 2010 hoda ŭražvaje navat siońnia.

Gears of War 3

Adna z samych «zubadrabilnych» stralałak paciešyła ŭładalnikaŭ PK tolki pieršaj svajoj častkaj. Brutalnyja dziadźki i ciotki, žachlivyja monstry, vializnyja strelby i paŭsiudnyja vybuchi — znoŭ ža, z časoŭ pieršaj hulni ŭsiaho stała bolej, u tym liku bałaŭ u recenzijach krytykaŭ. Hulnia musiła nazaŭsiody zaviaršyć tryłohiju — i lepiej by zavieršyła. Niečakanuju čaćviortuju častku, Gears of War: Judgment, addali ŭ ruki polskich raspracoŭščykaŭ People Can Fly. Palaki-ta zrabili niadrennuju hulniu, dy ŭ ich atrymaŭsia kłon Gears of War 3 ź blakłym siužetam.

God of War III

Jašče adzin «…of War 3» — nie mienš «zubadrabilny», ale ŭ im treba nie stralać, a bić. I nie ŭ militarysckaj budučyni, a siarod hrečaskich bahoŭ. Hałoŭny hieroj sieryi God of War, paŭboh Kratas zadumaŭ adpomścić samomu Zieŭsu dy zabiŭ boha vajny Aresa. Złobny antyhieroj, jaki rubić dvuma miačami ŭsio, što bačyć na svajoj darozie, dy šle kudy padalej uvieś Alimp — hetki vobraz pryhlanuŭsia mnohim hulcam, a sama sieryja hulniaŭ stała adnoj z hałoŭnych na Playstation.

Forza Horizon 2

U daŭniaj baraćbie dvuch lepšych honačnych sieryj, Gran Turismo (Playstation) i Forza Motorsport (Xbox), pieršaja peŭny čas upeŭniena pieramahała, ale ŭ apošni čas stała zdavać pazicyi jak pa recenzijach krytykaŭ, tak i pa vodhukach hulcoŭ. U 2014 hodzie Forza usio-ž abahnała GT. Forza Horison 2 skaryła hulcoŭ detalovym adkrytym śvietam, šykoŭnaj karcinkaj i, viadoma, raskošnymi aŭto. Daruj, Need for Speed, bitva za zvańnie «raja honščyka» adbyvajecca daloka ad ciabie.

Red Dead Redemption

Volnyja prastory, adkryty śviet, pierastrełki i kradziažy, Rockstar Games u jakaści raspracoŭščyka i niemały biudžet (kažuć, 100 młn dalaraŭ!). Karaciej, toj ža GTA. Tolki na Dzikim Zachadzie. I tolki dla PlayStation 3 i Xbox 360.

Sunset Overdrive

Park atrakcyjonaŭ, u jakim možna stralać. Usio babachaje, lotaje i plujecca kisłatoj ci… heta što, haziroŭka? Enerhietyčny napoj? Nie važna, lepiej zastrelić. I zrabić heta jak najbolej jaskrava i stylova. Takoha na kampjutarach nie było z časoŭ Surjoznaha Sema i Dziuka Niukiema, a toje i nie było naohuł.

Uncharted 3: Drake's Deception

Łara Kroft, Indyjana Džons… Kamu što, a ŭładalniki Playstation z hoda ŭ hod čakajuć čarhovuju sieryju pryhod Nejtana Drejka. Jon ledź nie nanoŭ vynajšaŭ žanr pryhod. I čarhovy pošuk hetych pryhod jon aktyŭna i cynična kamientuje — raspracoŭščyki viedali, što biaskoncaje palavańnie na bliskučyja skarby i ładnych dziaŭčyn mnohija ŭžo nie mohuć usprymać surjozna. Chočacie pabyć iraničnym avanturystam? Biažycie kuplać Playstation: padobna na toje, što Uncharted 4: A Thief's End, jakaja vyjdzie ŭ chutkim časie, stanie naohuł lepšaj hulnioj sieryi.

The Last of Us

Strašyłka, stełs-ekšn, roŭd-muvi, simulatar vyžyvańnia albo simulatar čałaviečaj psichiki, zombi-viersija «Leona» — jak tolki nie nazyvali hetuju hulniu. Suvoramu Džoełu pryjdziecca pravieści maleńkuju Eli praz usiu postapakaliptyčnuju Amieryku i ŭsiu hamu čałaviečych učynkaŭ. Pastralać asabliva nie daduć, zatoje daduć dastatkova pasłuchać i pahladzieć. Mnohija nazyvali hulniu vizualnym i aktorskim šedeŭram, a niekatoryja navat pabojvajucca mahčymaj kinaadaptacyi — maŭlaŭ, takija cudy, jak The Last of Us, nie paŭtarajucca. Chiba paŭtarajucca ŭ pieravydańniach dla kansolaŭ novaha pakaleńnia.

Mario Kart 8

Ciažka zrazumieć, što raźviasiołyja mulciašnyja honački robiać pobač z The Last of Us. Ale hulni sieryi Mario Kart stabilna stanoviacca chitami na kansolach Nintendo, a dla niekatorych źjaŭlajucca važkoj pryčynaj nabyć čarhovuju dziŭnuju cacku japonskaj kampanii. Napeŭna, Mario Kart 8 varta było by vypuścić dla inšych płatform prosta kab zrazumieć, jakoj budzie reakcyja na jaje pa-za miežami ciesnaha śvietu Nintendo. Nu i kab dać inšym zrazumieć, navošta naohuł santechnik Maryjo sieŭ za rul.

• 0
• 0
• 0
• 0
• 0
• 0
• 0
• 0