Raspačata bolš jak 50 kryminalnych spraŭ.
Dvoje žycharoŭ Žłobina zatrymanyja za machlarstva, rabavańnie, naŭmysnaje naniasieńnie ciažkich cialesnych paškodžańniaŭ i kradziež asabistych dakumientaŭ.
Jak paviedamlaje supracoŭnik adździeła infarmacyi i hramadskich suviaziaŭ UUS Homielskaha abłvykankama Ihar Hryškievič, u vobłaści za 2014 hod zafiksavana ŭ 2,5 razu bolš vymahańniaŭ, čym u 2013-m. Na hetym fonie Žłobin naohuł pakazvaje vialiki pryrost pa hetym artykule Kryminalnaha kodeksa: z dvuch da saraka faktaŭ vymahańnia, pavieličeńnie — u dvaccać razoŭ.
U krasaviku 2014 hoda ŭ Žłobinie byli zatrymanyja dvoje miascovych žycharoŭ, jakija ŭčynili za apošnija piać hadoŭ sorak faktaŭ vymahańnia. Aprača taho, im inkryminujecca jašče šerah złačynstvaŭ. Zatrymanyja — viadomyja ŭ horadzie ludzi, spartsmieny-volniki, siemjaniny, jakija majuć na vychavańni pa dvoje dziaciej, nie majuć nijakaha kryminalnaha minułaha. «Ale vyśvietliłasia, što pad «aviečaj» skuraj chavalisia ludzi žorstkija, biezapielacyjnyja, jakija adčuvali svaju pieravahu nad bolš słabymi», — udakładniaje Ihar Hryškievič.
Pavodle jaho infarmacyi, u pačatku sakavika 2014 hoda ŭ balnicu źviarnuŭsia kiroŭca adnaho z pradpryjemstvaŭ z traŭmami. Urač-traŭmatołah ahledzieŭ pacyjenta i dyjahnastavaŭ nie tolki drapiny i krovapadcioki, ale i razryŭ levaha lohkaha. 26-hadovy chłopiec paćvierdziŭ tolki fakt kanfliktu sa znajomym, a voś nazvać jaho kateharyčna admoviŭsia. Nie mienš spałochanaj vyhladała i žonka paciarpiełaha, jakaja dała anałahičnyja pakazańni. Padčas pravierki milicyjaj była pryznačana sudova-miedycynskaja ekśpiertyza. 7 krasavika prakuroram Žłobinskaha rajona była raspačata kryminalnaja sprava pa prykmietach składu naŭmysnaha naniasieńnia ciažkich cialesnych paškodžańniaŭ. I tolki paśla hetaha chłopca ŭdałosia razhavaryć: źbili jaho trenier miascovaj DIUSŠ i rabočy adnaho z pradpryjemstvaŭ.
Padčas vobysku pa miescy žycharstva 32-hadovaha ślesara znajšli pašpart na imia inšaha mužčyny. Tam ža byli znojdzieny ksierakopii kredytnych dahavoraŭ na nabyćcio pa rekvizitach znojdzienaha pašparta bytavoj techniki z rasterminoŭkaj płaciažu. Uładalnik pašparta, 33-hadovy rabočy, raskazaŭ, što ŭžo z 2009 hoda amal štomiesiac trenier i ślesar pad pahrozaj nasilla da jaho i jaho tavaryša patrabavali nabyvać u mahazinach tavary z nastupnaj pieradačaj vymahalnikam. Mužčyna pajšoŭ na ŭstupki spartsmienu. Chutka anałahičnyja patrabavańni afarmleńnia tavaru na siabie z nastupnaj pieradačaj byli pradjaŭlenyja i siabru mužčyny. Potym z takimi «prośbami» da tavaryšaŭ staŭ źviartacca i trenier DIUSŠ. Dajšło da taho, što pašpart vymahalniki ŭžo zachoŭvali ŭ siabie.
Apieratyŭnikam udałosia ŭstanavić, što takim čynam złačyncy stanavilisia haspadarami noŭtbukaŭ, aŭtamabilnych zapčastak, kresłaŭ, televizaraŭ, stavilisia ŭvachodnyja dźviery, rabiŭsia ramont u kvaterach. Žonkam darylisia załatyja ŭpryhažeńni, taksama aformlenyja na dvuch zapałochanych tavaryšaŭ. Pavodle źviestak pravaachoŭnikaŭ, takija apieracyi złačyncy prakručvali nie tolki ŭ Žłobinie, ale i ŭ Homieli, Babrujsku, Rečycy.
«Ich bajalisia. A kiroŭca, jakoha źbili, vyrašyŭ źmianić miesca pracy i admaŭlaŭsia vykonvać ich daručeńni. Darečy, jon byŭ tak napałochany, što paśla zdareńnia kinuŭ pracu, pakinuŭ Žłobin i źmianiŭ ź siamjoj miesca žycharstva», — padsumavaŭ Ihar Hryškievič.
Raspačata bolš jak 50 kryminalnych spraŭ u dačynieńni da dvuch zatrymanych.
Kamientary