Распачата больш як 50 крымінальных спраў.
Двое жыхароў Жлобіна затрыманыя за махлярства, рабаванне, наўмыснае нанясенне цяжкіх цялесных пашкоджанняў і крадзеж асабістых дакументаў.
Як паведамляе супрацоўнік аддзела інфармацыі і грамадскіх сувязяў УУС Гомельскага аблвыканкама Ігар Грышкевіч, у вобласці за 2014 год зафіксавана ў 2,5 разу больш вымаганняў, чым у 2013-м. На гэтым фоне Жлобін наогул паказвае вялікі прырост па гэтым артыкуле Крымінальнага кодэкса: з двух да сарака фактаў вымагання, павелічэнне — у дваццаць разоў.
У красавіку 2014 года ў Жлобіне былі затрыманыя двое мясцовых жыхароў, якія ўчынілі за апошнія пяць гадоў сорак фактаў вымагання. Апрача таго, ім інкрымінуецца яшчэ шэраг злачынстваў. Затрыманыя — вядомыя ў горадзе людзі, спартсмены-вольнікі, сем'яніны, якія маюць на выхаванні па двое дзяцей, не маюць ніякага крымінальнага мінулага. «Але высветлілася, што пад «авечай» скурай хаваліся людзі жорсткія, безапеляцыйныя, якія адчувалі сваю перавагу над больш слабымі», — удакладняе Ігар Грышкевіч.
Паводле яго інфармацыі, у пачатку сакавіка 2014 года ў бальніцу звярнуўся кіроўца аднаго з прадпрыемстваў з траўмамі. Урач-траўматолаг агледзеў пацыента і дыягнаставаў не толькі драпіны і кровападцёкі, але і разрыў левага лёгкага. 26-гадовы хлопец пацвердзіў толькі факт канфлікту са знаёмым, а вось назваць яго катэгарычна адмовіўся. Не менш спалоханай выглядала і жонка пацярпелага, якая дала аналагічныя паказанні. Падчас праверкі міліцыяй была прызначана судова-медыцынская экспертыза. 7 красавіка пракурорам Жлобінскага раёна была распачата крымінальная справа па прыкметах складу наўмыснага нанясення цяжкіх цялесных пашкоджанняў. І толькі пасля гэтага хлопца ўдалося разгаварыць: збілі яго трэнер мясцовай ДЮСШ і рабочы аднаго з прадпрыемстваў.
Падчас вобыску па месцы жыхарства 32-гадовага слесара знайшлі пашпарт на імя іншага мужчыны. Там жа былі знойдзены ксеракопіі крэдытных дагавораў на набыццё па рэквізітах знойдзенага пашпарта бытавой тэхнікі з растэрміноўкай плацяжу. Уладальнік пашпарта, 33-гадовы рабочы, расказаў, што ўжо з 2009 года амаль штомесяц трэнер і слесар пад пагрозай насілля да яго і яго таварыша патрабавалі набываць у магазінах тавары з наступнай перадачай вымагальнікам. Мужчына пайшоў на ўступкі спартсмену. Хутка аналагічныя патрабаванні афармлення тавару на сябе з наступнай перадачай былі прад'яўленыя і сябру мужчыны. Потым з такімі «просьбамі» да таварышаў стаў звяртацца і трэнер ДЮСШ. Дайшло да таго, што пашпарт вымагальнікі ўжо захоўвалі ў сябе.
Аператыўнікам удалося ўстанавіць, што такім чынам злачынцы станавіліся гаспадарамі ноўтбукаў, аўтамабільных запчастак, крэслаў, тэлевізараў, ставіліся ўваходныя дзверы, рабіўся рамонт у кватэрах. Жонкам дарыліся залатыя ўпрыгажэнні, таксама аформленыя на двух запалоханых таварышаў. Паводле звестак праваахоўнікаў, такія аперацыі злачынцы пракручвалі не толькі ў Жлобіне, але і ў Гомелі, Бабруйску, Рэчыцы.
«Іх баяліся. А кіроўца, якога збілі, вырашыў змяніць месца працы і адмаўляўся выконваць іх даручэнні. Дарэчы, ён быў так напалоханы, што пасля здарэння кінуў працу, пакінуў Жлобін і змяніў з сям'ёй месца жыхарства», — падсумаваў Ігар Грышкевіч.
Распачата больш як 50 крымінальных спраў у дачыненні да двух затрыманых.
Каментары